Mas’uul Hore Oo Puntland Ku Eedeeyay Ka Warqabka Kalluumeysiga Sharci Darada Ah

Puntland

Agaasimahii hore ee la dagaalanka burcad Badeedda maamulka Puntland C/risaaq Maxamed Dirir (Duceysane) ayaa sheegay in maamulka Puntland uu ka warqabo kalluumeysi sharci darro ah oo maraakiib shisheeye ka wadaan xeebaha dalka.

Agaasimaha oo wareegto kasoo baxday maalintii shalay ahayd (Isniin 20-03-2017) xilka looga qaadey ayaa sheegay in waxyaabaha isaga lagu maagay ay kamid tahay ka hadalka maraakiibtaasi sharci darrada ah waa sida uu hadalka u dhigaye.

Waxa uu tilmaamay agaasimaha inuu hayo caddeymo buuxda oo arrintaasi ku saabsan, islamarkaana xeebaha dalka ay ku jiraan Maraakiib Kuuriyaan ah oo gaaraya Afar, kuwaasi oo uu tilmaamay in maamulka Puntland ka warhayo u bedalay magacii, ay saarteen calankii dalka si ay kheyraadka badda ula baxaan.

“Haddii aad tagto xeebaha habeennimo waxaad arkaysaa sida sharci darrada ah ee loo jilaabanayo, waa Iiraaniyiin, Yemen iyo kuwo aan anagga lug ku leenahay oo wasaaradaheena iyo dowladdeena (Puntland) lu ku leedahay oo ay bixiso leesinnada, waxaana hayaa caddeymo ku saabsan arrintaasi oo maraakiib Kuuriya oo Afar ah ay ku jiraan xeebteenna illaa iyo muddo hore laga soo bilaabo 2004, waxay bedaleen magacii markii dowladdaasi ay sheegtay in maxkamad la taagi doono ciddii lagu arko Jilaabasho sharci darro ah, qoraalkiina waan hayaa, markii ay sidaasi yiraahdeen Soomaali baa dabcan wada, dowladana (Puntland) waxbay ka ogtahay, calankii Kuuriya waa la dejiyey oo waxaa la saaray calanka Soomaaliya, waana meelaha la iga soo galay bilowgii” ayuu yiri Duceysane.

Kalluumeysatada Soomaaliyeed, gaar ahaan kuwa ku sugan xeebaha Puntland ayaa aad uga cabanayey maraakiib shisheeye oo xaaluf ku haya kheyraadka badda iyaguna aaney ka shaqeysan  karin.

Goobjoog News