U bood dhigaalka

Warbixin: Qaraxii Zoobe Oo Sababay Burbur Dhaqaale oo Ka Badan $6.3 Milyan

Sheeko:Dalka

Inkastoo qasaaraha nafeed aysan jirin wax ka muhiimsan, hadane Goobjoog qeybteeda ganacsiga (Goobjoog Business ) waxa ay tiro-koob ku sameysay khasaaraha dhaqaale ee soo gaaray ganacsiyadii iyo xarumahii ku yaallay goobta uu qaraxa ka dhacay October 14.

Sidaa darteed, koox wariyeyaal ah oo ka tirsan Goobjoog ayaa sameeyay xog ururin ku saabsan dhibaatada dhaqaale ee ka dhalatay qaraxii isgoyska Zoobe ee magaalada Muqdisho ka dhacay 14-kii bishan.

Xog-ururintan oo qaadatay muddo Sadex maalin ah ayaa wariyeyaasha waxa ay la kulmeen 80% milkiilayaasha ama maamulayaasha goobahii ganacsi ee ku burburay meesha uu qaraxa ka dhacay.

Qasaaraha Hantiyeed/Maaliyadeed

Waxaa  uu qaraxii October 14 qasaarooyin dhaqaale ama hantiyeed u geystay in ka badan 80 xarumo ganacsi ah oo isugu jira carwooyin, hoteello, xafiisyo, dukaanno, xawaalado, shirkado, kaalimo shidaal, madbacado, maqaayada iyo kuwa kale.

50% goobaha ganacsi ee ku burburay qaraxaas waxaa sababay dab ka dhashay qaraxa oo ku faafay xarumo badan oo ganacsi oo ku yaallay isgoyska Soobe.

Haddii aan qeyb-qeyb u kala qaadno, xarumaha lagu iibiyo qalabka dhismaha guryahaayaa kamid ah qeybaha ugu badan ee uu qasaaraha soo gaaray waxaaana ay shirkadahaasi wadar ahaan qaraxii Soobe ku waayeen $1,544,887.17

Halka wadarta qasaaraha soo gaaray maqaayadaha iyo hoteeladana ay gaarayaan $2,845,735.00. Hoteelada iyo maqaayadaha ku yaallay Soobe ayaa ah qeybaha ganacsi ee saameynta ugu badan uu ku yeeshay qaraxii October 14.

Hotel Safari oo ka koobnaa 45 qol oo qalabeysnaa, 3 hool oo dhowaantan la dayactiray iyo maqaayad weyn ayaa gebi-ahaanba burburay oo hadda waxuu noqday boos banaan oo hadda kadib dhismo u baahan.

Wadada Soobe waxey caan ku aheyd carwooyinka lagu iibiyo dharka ragga iyo dumarka iyo sidoo kale waxyaabaha ay haweenka isku qurxiyaan. Waxaa gebi-ahaanba burburay carwooyinkii ku yaalay banaanka Hotel Safaari ee dhanka isgoyska xigay. Wadarta qasaaraha maaliyadeed/hantiyeed ee carwooyinka soo gaaray waxaa ay Goobjoog Business soo ogaatay in tahay $400,070.60 ugu yaraan.

Sidoo kale, waxa qasaaro lixaad leh soo gaaray xurumaha lagu iibiyo qalabka elektarooniga— oo ay kamidyihiin taleefonada, taleefishinada, kumbiyuutarada, qasaaladaha dharka IWM— kuwaasoo ku yaallay hareeraha isgoyska Soobe, waxaana wadarta hantida burburtay lagu qiimeyay $323,670.00.

Haddii aan soo-koobno xarumaha shidaalka lagu iibiyo waxaa ku qasaartay hanti dhan $21,000, halka dukaamada bagaashka ah iyo farmashiyeyaasha ee uu qaraxa saameeyay ay gaartay qasaaro dhaqaale oo dhan  $250,900.00.

Halkan hoose ka eeg qeybaha kale oo faahfaahsan:

Hadaba wadarta burburka dhaqaale ee ka dhashay qaraxii October 14 ka dhacay isgoyska Soobe ayaa waxa uu noqday $6,306,061.77

Talo Soojeedin & Gabogabo

Mudadii Goobjoog Business ay xog-aruurintan sameyneysay waxa ay dareentay in ganacsatadii ku hanta-beeshay goobta uu qaraxa ka dhacay ay ka niyad-jabsanaayeen musiibada ku habsatay ehelkooda iyo hantidoodaba.

Qaar kamid ah ganacsatada oo aan la sheekeysanay waxaa ay innoo sheegeen in ay goobahooda ganacsi ay shaqo abuur sameyn jireen sidoo kalena dad badan ay ku tiirsanayeen waxa kasoo baxa ganacsigooda, balse waxaa wejiyadooda ka muuqatay in hadda ay rajadoodu soo koobmeyso.

Waxaan cadeyn u baahneyn in ganacsatadaas ay u baahanyihiin in la-taageero oo la-gacan qabto. Sidaa darteed waxaa dowladda, maamul goboleedyada, guud ahaan dadka Soomaaliyeed iyo beesha caalamkaba la gudboon in ay garab-qabtaan guud ahaan dadka ilahooda dhaqaale ku waayay qaraxa maadaamaa dadkii ku dhaawacmay ee dowladda iyo dadka Soomaaliyeedba ay taageeri lahaayeen loo qaaday dalal kale oo la dabiibay, waxaa haboon in cududda leysugu geeyo sidii loo taageeri lahaa ganacsatadaas.

Ugu dambeyntii, Goobjoog Business waxa ay cadeyneysaa in natiijada tirakoobkan uu noqon kara mid u dhigma ama aan u-dhigmin qasaaraha hantiyeed ee saxda ah ee ka dhashay qaraxii October 14. Sidaa darteed, waxaa suuragal ah in uu la ekaado qasaaraha maaliyadeed ee dhabta iyo inuusan la ekaan.