Hirshabelle: Xildhibaan Ka Horyimid Magacaabista Wasiirada Cusub

Xildhibaan Maxamuud Wabar oo kamid ah mudanayaasha baarlamaanka maamulka Hirshabelle ayaa ka horyimid magacaabista wasiirada cusub ee maamulkaasi.

Waxa uu sheegay xildhibaankan oo lasoo xiriiray Goobjoog News, in madaxweyne Cosoble uu wasiirada kusoo magacaabay sharci darro iyo la tashi la’aan waa sida uu hadalka u dhigaye.

“Hirshabelle dadka deggan Hiiraan iyo Shabellaha Dhexe ayaa wada leh, waxaa loo baahnaa wadatashi iyo is afgarad, Jaabka dambe ayuu warqad kala soo baxay oo uu iska soo magacaabay wixii uu doonay, waa arrin aan kasoo horjeedno” ayuu yiri xildhibaanka.

Xildhibaan Wabar ayaa dhinaca kale sheegay in qaar ka mid ah beelaha deggan Hirshabelle aan tixgelin iyo la tashi aan laga siin wasiirada cusub, islamarkaana ay u arkaan mid la gacan bidixeeyey.

Madaxweynaha maamulka Hirshabelle Cali Cabdullaahi Cosoble ayaa fiidkii xalay waxa uu soo magacaabay 52 wasiir, waxaana wasiiradan uu horgeyn doonaa baarlamaanka maamulkaasi, si ay codka kalsoonida ugu qaadaan.

Goobjoog News