U bood dhigaalka

Madaxweyne Ku-xigeenka Jubbaland oo Ka Hadley Amniga iyo Arrimo Kale

Sheeko:Amniga

Madaxweyne ku-xigeenka koowaad ee dowlad gobaleedka Jubbaland Maxamuud sayid Aadan ayaa maanta ka warbixiyey xaladda guud ee Jubbaland, isaga oo soo hadalqaaday arrimaha amniga Jubbaland iyo howlagalada ciidamada daraawiishta ay ka wadaan deegaannada Jubbaland.

Madaxweyne ku xigeenka ayaa sidoo kale xukuumadda hadda jirta ku dhaliilay in ay ka jiifatay waajibkii ka saarnaa amniga iyo in la xoreeyo deegaannada ka maqan gacanta dowladda isaga oo xusay in xukuumaddu ku mashquushay arrimo kale kana mashquushay amniga waxaana uu yiri.

“Doorashadii markaan ka soo baxnay ka dib waxaa u howlgalnay dib u xoreyn balaaran inaan samayno dhaqdhaqaaqyo badan ayaa la sameeyey xaga deegaanka furinta hore ee Sanguuni horay ayaa loo dhaqaaqay waxaa lagu dhowaaday Jamaame, xaga Afmadow dhaqdhaqaaq ayaa laga sameeyey oo looga golleeyahay Xagar iyo Bu’aale in la qabto xaga Gedana dhaqdhaqaaq ayaa laga sameeyey waa cadow muddo nala noolaa ayagoo deegaannada gacanta ku haayo, waxaana wadnaa inaan soo afjarno, inagga oo iskaashi ka sugeyna beesha caalamka, AMISOM iyo dowladda federaalka wallow xukuumadda hadda jirta aan ku dhaliilayno in ay ku mashquushay arrima aan muhiim aheyn kana mashquushay waajibaadkii ka saarnaa dalka inuu amni helo haddii aan amni la helin wax kale oo laga fakari karo majiro” .

Sidoo kale madaxweyne ku-xigeenka ayaa soo hadal qaaday hadal warar maalmihii tagay la isla dhexmarayey oo ahaa inuu wadahadal shakhsiyadeed uu kula jiro madaxda dowladda Federaalka Soomaaliya isaga oo arrintaas ka hadlayo waxaa uu yiri. “Maxamuud Sayid Aadan hoggaanka Jubbaland ayuu ka mid yahay xeer ayuu ku dhaartay kitaab ayuu maray markaan kalsooni aan baarlamaanka ka helay afarta sano ee soo socota inaan Jubbaland aan u shaqeynayo, wadahadal dowladda iyo Jubbaland kala aragti duwanaanta u dhaxeyso lagu xalinaayo qeyb waan ka noqon karaa lakiin waa markaan Jubbaland aan wakiil uga ahay oo aan anigu hoggaaminaayo wax qarsoomayo maahan haddii maanta ay wada hadal dalbadaanna waan la hadlaynaa annaga oo wafdi Jubbaland ka socda ah lakiin maxaan anigu kala hadlay ma xeerkii iyo kitaabkii aan maray miyaan been ka sheegayaa waa wax been abuur ah.”

Dhanka kale madaxweyne ku-xigeenka ayaa ka hadlay qorshahooda ku aadan gaaritaan ka magaalada caasimadda u ah Jubbaland ee oo Bu’aale oo gacanta ugu jirta Al-shabab oo muddooyinkii dambe iyagu maamulayey waxaana hadalkiisa ka mid ahaa.

“Waa wax muhiim ah oo noo qorsheysan horayna noogu qorsheysnaa maalinba meel ayaa la sii gaarayey wallow dagaalku uu ahaa dowladda Federaalka, dowlad gobaleedka iyo howlgalka AMISO si qorshaysan looga wada howlgalo gaabisna aan ka aragnay dhinacyada kale oo dib loo celiyey dagaalka Al-shabaab haddana waqti kasta hanagu qaadatee waa noo qorsheysan tahay inaan mardhow ka guul gaarno”.

Ugu dambeyn madaxweyne ku xigeenka dowlad gobaleedka Jubbaland Maxamuud Sayid Aadan ayaa ugu baqay madaxda dowladda Federaalka in heshiis lagu wada socdo dalkana la badbaadiyo .

“Waxa caalamku kuwada nool yahay waa wax ay ku heshiiyeen heshiskaas aan wanaajinno dastuurkeenna aan qabyo tirno inta hadda uu na farayo aan ku dhaqanno qof weliba kaas dib ha u aqriyo kaas ha loo noqdo maanta waxaan ku talinayaa hala iska daayo waxyaabaha kale ee lagu mashquulsan yahay Caano daatay dabadooda ayaa la qabtaaye aan wada jir dalka aan u badbaadinno” ayuu hadalkiisa ku soo gabangabeeyey madaxweyne ku-xigeenka Jubbaland Maxamuud Sayid Aadan.

Goobjoog News