U bood dhigaalka

Madaxweyne Xasan Sheekh Oo Ka Warbixiyay Ulajeedka Safarkii Uu Ku Tagay Baladweyne

Sheeko:Dalka

Madaxweynaha Soomaaliya Xasan Sheekh Maxamuud ayaa ka warbixiyay ulajeedka safarkii uu ku tagay magaalada Baladweyne ee xarunta gobalka Hiireaan, isaga oo sheegay in kulamadii uu magaaladaasi kula soo qaatay odayaasha dhaqanka inay ku soo dhammaadeen is afgarad iyo guul.

War qoraal ah oo ka soo baxay xafiiska madaxweyne Xasan Sheekh Maxamuud ayaa lagu sheegay in kulamadii ka dhacay magaalada Baladweyne la isku soo afgartay in shirka maamul u sameynta goballada Hiiraan iyo Shabeellaha Dhexe lagu qabto magaalada Jowhar isla markaana caasimadda ay noqoto degmada Buuloburde ee gobalka Hiiraan.

War-saxaafadeedka ayaa sidan u qoran:-

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud iyo wafdi uu hoggaaminayo oo ka koobanaa labadda gole ee Dowladda federaalka oo mudo seddex maalmood ah ku sugnaa magaaladda Beledweyn ee gobolka Hiiraan ayaa  dib ugu soo laabtay magaaladda Muqdisho.

Maalmahii uu Madaxweynaha ku sugnaa Beledweyn ayaa si guud iyo si gaaar gaar ahba ula kulmayey Odayaasha dhaqanka, Waxgaradka iyo siyaasiyiinta beelaha dega gobolka Hiiraan. Madaxweynaha ayaa kala hadlayey sidii loo sii adkeyn lahaa heshiiskii dhowaan la dhaxdhigay beelaha walalaha ah ee ku dagaallamay magaaladda Beledweyn iyo in bulshadda gobolka Hiiraan warbixin laga siiyo dhismaha maamulka gobolleedka Hiiraan iyo Shabellaha Dhexe .

” Allaah ayaa mahad leh oo si guul ah inoogu soo dhameeyey kulamadii aan la lahayn reer Hiiraan, kulamadaas oo ujeedadoodu ahaayd la-tashiyo iyo in aan u sharaxno dhisamaha maamulka Hiiraan iyo Shabellaha Dhexe oo qorshuhu yahay in todobaadka soo socda ka furmo magaaladda Jowhar iyo inaan sii xoojino heshiiskii la dhax-dhigay beelahii walaha ahaa ee khilaafka ku dhaxmaray Beledweyn si aysan mar dambe colaad u soo noqon” ayuu yiri Madaxweyne Xasan Sheekh.

Sidoo kale Madaxweynaha ayaa yiri” Waxaan aad iyo aad igu mahad-celinayaa Odayaasha dhaqanka iyo qeybaha kale ee bulshadda Gobolka Hiiraan oo soo dhaweyn waanaagsan inoo sameeyey , islamarkaana nala wadaagay dareenkooda iyo kalsoonida ay ku qabaan Dowladda Federaalka ah.

Madaxweynaha Jamhuuriyadda Federaalka ayaa sidoo kale uga mahad-celiyey Odayaasha dhaqanka gacantii ay dowladda federaalka ah ku siiyeen in xal laga gaaro khilaafkii dadka walaaha ah ku dhaxmartay Beledweyn.

DHAMMAAD

Shador Haji
Xafiiska Madaxweynaha