U bood dhigaalka

Nicholas Kay “Soomaaliya Horumar Ayeey Ka Sameysay Arimo Badan Oo Jiray”

Sheeko:Dalka

Ergayga gaarka ah ee Qaramada Midoobay u qaabilsan arimaha Soomaaliya Nicholas Kay ayaa wareysi uu siiyay Goobjoog News waxa uu kaga hadlay arimo badan oo xasaasi ah.

Kay ayaa mar uu soo hadal qaaday horumarka dalka gaaray waxa uu sheegay in arimaha siyaasadda iyo Federaalka horumaro wanaagsan laga gaaray.

Sidoo kale waxa uu sheegay in hadda dalka ay ka socdaan howlgallo ka dhan ah Al-shabaab oo loogu magac daray Furashada Jubooyinka, isaga oo sheegay in amniga wax badan uu iska bedalayo.

“Waxaan is leeyahay wadanka waxa uu sameeyay hormar aad u wanaagsan oo dhanka siyaasadda ah Sideedii bilood ee lasoo dhaafay, hormar laga gaaray dhanka Federaalka isna waa mid aad u muhiim ah, oo waxaan soo dhaweynay dhismaha maamulka KMG ee Galmudug, waxaan sidoo kale aan is leeyahay waxaa la sameeyay horumaro aad u muhiim ah oo dhanka ammaanka ah, iyadoo uu jiro dagaal cusub oo bilawday kaas oo ka dhan ah Xarakada Al-shabaab, looguna yeeray Furashada Jubooyinka, sidoo kale waxaa jira qorsheyaal waaweyn oo la doonayo in lagu caawiyo horumarka ciidamada Qaranka Soomaaliya iyo Booliiska Qaranka Soomaaliyeed, marka kuwaasi waa hormaro wanaagsan, dhaqaale ahaan wadanku waa mid xarbinaya, dhalinyarada weli waxaa haystay dhibaatooyin xagga furasadaha shaqo la xiriira, dhanka waxbarashada iyo tababarada, marka waxaan dooneynyaa in arimahaasi hadda diiradda saarno, bilaha soo socda waxaa jira qorshe cusub oo dowladdu la imaanayso oo la doonayo in wax looga qabto sida ay shaqooyin u heli lahaayeen dhalinyarada, waxaana rajeyneynaa in ay bilaw u noqon doonto isbedal wax looga qabanayo Dhalinyarada bilaha soo socda illaa dhamaadka sanadka” ayuu yiri Kay.

Sidoo kale Kay ayaa sheegay in gaabis weyn laga dareemayo siyaasadda iyo Dimuqraadiyadda Soomaaliya, loona baahan yahay in la dardargeliyo howlaha marka la gaaro 2016-ka.

“Waxaan is leeyahay hormarka laga gaaray dhanka siyaasadda iyo dimuqraadiyadda waa mid gaabis ah, oo aan ahayn sidii la rabay, waana mid aan ahayn sidii Soomaalidu ay doonayeen, guddiga madaxa banaan ee doorashada xilli dambe ayaa la dhisay oo lagu dhawaaqay, isbedalka lagu sameynayo Dastuurka sidoo kale waa mid ku socday gaabis, waxaa dhawaan wada fariisannay gabagabadiisa natiijada, waxaana ay noqotay xaqiiqdii in arintaasi aysan suurta gal noqon doonin marka la gaari 2016-ka in aysan muuqan in qof iyo cod wadankaan in ay ka dhacdo oo doorasho la qaato, laakiin waxaa jiri doona geedi socod doorasho, waxaa cad qof kasta in uusan jiri doonin in isaga uu codeeyo hase ahaatee la doonayo in arimahaasi xogtooda laga helo baarlamaanka ama fulinta sida ay wax u dhacayaan, iyadoo aysan jirin wax muddo kororsi ah” ayuu hadalkiisa ku daray Kay.

Wakiilka gaarka ah ee Qaramada midoobay u qaabilsan arimaha Soomaaliya Nicholas Kay ayaan weydiinnay ka maqnaanshiyahii shirkii ka dhacay dhawaan magaalada Muqdisho maamulada Jubbaland iyo Puntland waxa uu muujin karo.

“Waxaan is leeyahay Jubbaland iyo Puntland inay xaqiiqdii sii wadi doonaan geeddi socodka hiigsiga cusub, islamarkaana ay ka shaqeyn doonaan sidii loo dhisi lahaa Soomaaliya oo mideysan, xoogan, islamarkaana Federaal ah, madaxweynaha waxa uu sheegay in uu la hadli doono dhammaantood, ayna yihiin qeybo aad muhiim ugu ah Soomaaliya, waxaana uu sheegay Madaxweynaha inuu qaban doono arintaan maalmaha soo aadan iyo Isbuucyada si loo xaliyo arimahaan”

Sidoo kale Kay ayaan wax ka weydiinnay arimaha doorashad iyo sida ay noqon karaan si looga dhabeeyo go’aanadii horay loo gaaray.

“Ma garan karo, waxaad tahay Soomaali, waad ii sheegi kartaa, tani xulasho Soomaalida ay leedahay weeye, Soomaalida ayeey quseysaa, Baarlamaankooda, dowladda, maamulada heer gobal ee KMG ah, Bulshada rayidka ah, waana Soomaalida inay go’aan ka gaarto habka ugu wanaagsan ee doorasho ay u dhici karto 2016-ka, waxaa jiri doona wadooyin badan oo suurta gal ah, dhammaantoodna waad garan kartaa”

Dowladii Marayka shirkii ka dhacayay Copenhagen 2014-kii kama aysan qeyb galin , kaasi oo looga hadlayay hiigsiga Soomaaliya, hadaba waxa aynu Kay weydiinay sida uu u arko isbedalada muuqda iyo hadda waxa ay tahay in laga gaari karo.

Haa waad saxan tahay Maraykanku kama qeybgalin shirkii ka dhacay magaalada Copenhagen , laakiin mararka qaar waxaa dhici kara arimo gaar ah, taasi oo ay ku adkaan karto in qofka uu shirka kasoo qeybgalo ,sida dhacday Puntland iyo Jubbaland uga soo qeybgalin shirkii ugu dambeeyay, wax kasta wey hagaagi doonaan, dadku mar kale ayeey isku imaan doonaan, maantana waad wada aragtaan in dadku ay wada fadhiyaan, dowladda Maraykanka iyo 30 wufuud caalami ah ayaa kasoo qeybgalay shirkii dhawaan Muqdisho ka dhacay, waana shirkii ugu weynaa ee muddo 10-sano ah ka dhaca wadankaan”

Ugu dambeyn Kay ayaan weydiinnay cusbooneysiinta golaha ammaanka ee ee waqti kordhinta UNSOM iyo howlgalka AMISOM waxa ay ka geysan karto arimaha hadda la doonayo in la qabto.

“Golaha ammaanka ee Qaramada Midoobay dib ayuu cusbooneysiiyay ogolaanshaha, waana ku saxan tahay, waana is leeyahay inay rajeynayaan horaanta Sanadkaan 2016-ka inay muhiim u tahay in la gaaro Hormaro, hadii ay ahaan lahayd ammaanka iyo siyaasadda, waxaa hadda nasoo haya Sanad aad u muhiim ah, kaasi oo ah in Baarlamaanka ay u harsan tahay 12-bilood, ka dibna madaxweynaha waxaa laga fursaneyn in la’iska hubiyo, waxyaabaha qaar” ayuu hadalkiisa kusoo gabagabeeyay ergayga gaarka ah ee Qaramada Midoobay u qaabilsan arimaha Soomaaliya Nicholas oo Waryesi gaar ah siiyay Goobjoog News.