U bood dhigaalka

Qabiilka Oo Caqabad Ku Ah Dhallinyarada Waxbaratay Ee Shaqadoonka Ah

Sheeko:Dalka

Qabyaaladda ka jirta Soomaaliya waxa ay saameysay horay u kaca bulshada, dhallinyarada Soomaaliyeed oo 70% ka ah bulshada ayaa intooda badan waxbartay, gaar ahaan kuwa qoysaskooda dhaqaallo ahaan iyo maqaam ahaan horumarsaneyn.

Tiro badan oo ka mida dhallinyarada Soomaaliyeed oo dhameysatay waxbarashada ayaan helin fursado shaqo, iyada oo sababta ugu weyn ay tahay reerahooda oo aan u badneyn loo shaqeeyaasha.

Cabdixakiin Cabdullahi oo ka mida dhallinyarada waxbaratay oo haddana qabiilka uu caqabad ku noqday shaqadiisa ayaa Goobjoog News uga warramay waxa uuna yiri :

“Qof aad taqaanno oo qabiilkaaga ah hadduusan meesha ku jirin, waxaa lagu leeyahay cawo ha ku keeno, waxaa iila yaab badnaa maalin maalmaha ka mida dowladda ayaa shaqooyin xayeysiisay, anigu waxaan geeyay CV maalin maalmaha ka mida aniga oo Xamarweyne Marayo ayaan waxaan arkay warqaddeydii oo wadada bideyso, maalintaas ka dib ayaan nacay in shaqo dambe aan codsado oo CV aan qoro”.

Arrintani ayaa hoos u dhigi karta rajada dhallinyaro badan oo hadda  ay qaarkood ku jiraan jaamacadaha, kuwaas oo ka walaacsan in aysan heli doonin shaqooyin ka dib marka ay waxbartaan Saalax Axmed Saalax oo ah ardey waxa uu yiri:

“Waxaa jira walwal dhanka shaqada ah, sidaa ogtahay waddanka waxaa lagu maamulaa 4.5, taasi waxa ay ku tusineysaa  qofka aan ka dhallan qabiil xoog leh shaqo ma helayo, waxaan aragnaa dhallinyaro badan oo waxbaratay oo haddana shaqo helin, waxaana caqabad ku noqday qabiilka”.

Qabiilku waa naafeeyaha horumarka dalka, sidoo kale qabyaaladda ayaa wiiqi karta dowladda markaasi jirta haddii uu ka awood bato sida uu Goobjoog News u sheegay Bashiir Cabdulqaadir Axmed oo ah aqoonyahan waxa uuna yiri:

“Qabiilka Saameyn badan ayuu ku yeeshay nolasha qeybaheeda kala duwan, waxaana la soo galiyey arrimaha bulshada, siyaasadda iyo maamulkii intaba waxa uu ku yeeshay saameyn taban”.

Qabiilka ayaa xilligani aad ugu badan Soomaaliya, waxa uuna saameeyay nolosha hoose ee qoysaska waxaana la sheegaa xataa guurka in la isku xusho qabiilka.

Goobjoog News