Soomaaliya: Maxaa Looga Hadli La’yahay Mareykanka Iyo Duqeynta Rayidka?!!
Dhacdadii Bariire Jimcihii ka dhacday, dadka Soomaaliyeed waxaa ay hadal-hayaan ciidamada dowladda ahaa ee rayidka dilay, waxaaba la iloobey in ay Mareykanka ku lug lahaayeen dhacdadan, Mareykanka bishan keliya ku dhawaad 10 duqeyn ayey ka geystay Koonfurta Soomaaliya, qaar weeraradaasi ka mid ah waxaa ku dhintay dad rayid ah, laakin lalama xisaabtano!!
Ciidamada Mareykanka waxaa ay sheegteen isla bishan gudaheeda in Milatarigoodu ay Jilib ku dileen 7 Al-shabaab ah, hase ahaatee warar madax bannaan oo degaanadaas laga helayo ayaa sheegaya in weerarkan oo ay geysatay dayuurad Drones ah lagu dilay qoys ka koobnaa todobo ruux, oo weliba ay ku jireen haween iyo caruur…arrinta layaab leh, ma jirto labo ka wada hadashay.
Mareykanka xataa waxaa ay ciidan ka dileen dowladda, bishii September ee sanadkii tagay, duqeyntii diyaaradaha Mareykanka ay ka fuliyeen gobolka Mudug waxaa ku dhimatay 10 askari oo ka mid ahaa ciidamada dowladda.
Duqeyn kasta ee uu Mareykanka ka geysto gudaha Soomaaliya waxaa la arkaa labo war Saxaafadeed oo kala duwan, mid dowladda federaalka ah iyo mid Mareykanka ah, Soomaalida waxaa ay sheegaan in madaxweyne Maxamed Cabdullahi Farmaajo uu amray weerarka la qaadey halka US AFRICOM ay daabaco in ay ogolaashiyaha ka heystaan madaxweyne Trump qoraal uu soo saaray March sanadkan “This strike was conducted within the parameters of the proposal approved by the President in March 2017, which allows the U.S. Department of Defense to conduct lethal action against al-Shabaab within a geographically-defined area of active hostilities in support of partner force in Somalia”.
Safiirka Soomaaliya u fadhiya Mareykanka Ambassador Axmed Ciise Cawad oo mar sii horeysay aan weydiinay in Villa Somalia ogtahay duqeymaha Mareykanka geystaan iyo in kale? Siduu rabo ayuu ka sameeyaa kuma dhihin anigu….laakin wey duqeeyaan baan ku dhahay, sidaa ayuu iigu jawaabay!!
Mareykanka horay 1993-dii waxaa ay rayid badan ku dileen gudaha caasimadda Muqdisho, dadkaas waxaa ay ugu yimaadeen in ay ka caawiyaan macluusha heysatay, laakin xabad ayey ugu badaleen, dhibaatadaasi illaa hadda magdhaw lagama bixin, cid hadashana ma jirto, 24 sano kadib weli rayid ayey dilayaan, Taariikhda hore dowlad kama jirin dalka laakin hadda oo ay dowlad ka jirto, marka ay Mareykanka rayid dilaan, isla markaana aan lala xisaabtamin waa nasiib darro iyo tabar darro dowladda federaalka ah.
Xiriirka Soomaaliya iyo Mareykanka:
Soomaaliya waxaa ay xiriir la laheyd Mareykanka illaa xoriyaddii 1960-kii, Safiirradii soo maray waxaa ay kala ahaayeen: Cumar Macalin, Qeybe, Yusuf Azhari, Cabdulahi Adow, Kimiko, Cabdulahi Cadow, Maxamed Xaaji Nuur, Cabdikarim, Cumar Cabdirashid iyo Axmed Ciise Cawad.
Xiriirka Soomaaliya iyo Mareykanka waxaa uu marayaa wejigii 4-aad, dowladihii rayidka ahaa ee 1969-kii ka horeeyay waxaa uu Mareykanka la lahaa xiriir aad u fiican, laakin waxaa ay wax walbo is badaleen markii uu Maxamed Siyaad xukunka qabsaday isagoo xiriir la lahaa bariga iyo midowga Soviet, dagaalkii 77 kadib waxaa dib u soo noqday xiriirka labada dhinac hadana waxaa uu xumaaday markii uu Caydiid ka dilay 18 askari October 1993-dii isla markaana uu fashilmay qorshihii uu Mareykanka horkacayey ee rajo soo celinta, hadana waxaa ay markii ugu horeysay Mareykanka Soomaaliya aqoonsadeen 2013-kii oo ah xiliga dowladdii Xasan Sheekh.
Mareykanka qaabab kala duwan ayey Soomaaliya u taageeraan, qaar waxaa ay soo mariyaan hey’adaha UN-ka, qaar waxaa ay soo mariyaan hey’adahooda, taakuleyn banii’aadamnimo, kuwa hor u marineed, waxaa ay qabaa USAID, AMISOM lacag ayey siiyaan, waxaa kaloo jirta lacag ay toos u siiyaan dowladda ama xitaa tababaro iyo arrimo kale oo ay naga caawiyaan.
W/Q: Cabdi Caziz Gurbiye,
Goobjoog News