Shil Train oo Khasaare Sababay oo Ka Dhacay Dalka Czech ee Bariga Yurub

Afar qof ayaa ku dhimatay in ka badan labaatameeyo kalena waa ay ku dhaawacmeen shil Tareen oo ka dhacay magaalada Pardubice ee dalka Czech, oo qiyaastii 100 KM u jirta caasimadda dalkaas ee Prague.

Shilka ayaa yimid ka dib markii Tareen rakaabka ah oo ay saarnaayeen in ka badan 300 oo qof, kuna sii jeeday bariga dalka Ukraine uu ku dhacay tareen kale oo shixnad ama xamuul siday sida ay saraakiishu sheegeen.

“Waxaan xaqiijin karaa in afar qof ay ku geeriyoodeen shilka,” ayuu yiri Alena Kisiala, oo ah afhayeenka adeegyada gurmadka maxalliga ah, oo la hadlay Warbaahinta.

Raiisul wasaaraha Czech Petr Fiala ayaa u tacsiyeeyay dadkii ku dhintay shilka, waxa uuna ku tilmaamay masiibo weyn sida uu ku sheegay qoraalo uu soo dhigay bartiisa X.

Tareenka ayaa ka soo ambabaxay magaalada Prague wuxuuna ku sii jeeday magaalada Chop ee dalk Ukraine oo ku dhow xadka Slovakia, waxaana dadkii saarnaa ay ku jiray ajaaniib bad.