UK iyo Soomaaliya oo qaraar cusub u gudbiyay Qaramada Midoobay

Boqortooyada Midowday ee UK iyo Soomaaliya ayaa soo saaray qaraar qabyo ah oo ay ku doonayaan in dib loogu cusboonaysiiyo waajibaadka Khabiirka Madaxabannaan ee xuquuqda aadanaha ee Soomaaliya.

Qaraarkan ayaa soo dhoweynaya dadaallada Soomaaliya ee joogtada ah ee lagu horumarinayo ilaalinta xuquuqda aadanaha, iyada oo si gaar ah loo xusay ansixinta Sharciga Xuquuqda Naafada iyo sameynta koox farsamo oo heer wasiirro ah oo ka shaqeysa arrimaha xuquuqda aadanaha.

UK ayaa ku ammaantay Soomaaliya wadashaqeynteeda joogtada ah ee la leedahay Khabiirka Madaxabannaan iyo hay’adaha caalamiga ah, gaar ahaan Golaha Xuquuqda Aadanaha ee Qaramada Midoobay.

Dadaalka Soomaaliya ee dhinaca xuquuqda aadanaha ayaa lagu tilmaamay mid tusaale u ah sida ay u qaadatay waajibka arrintan.

Sidoo kale, qaraarka ayaa ku dhiirrigelinayay dowladda Soomaaliya inay sii wado hirgelinta ilaalinta xuquuqda dadka nugul, iyada oo lala shaqeynayo saaxiibada caalamiga ah si looga hortago caqabadaha jira.

UK waxay carrabka ku adkaysay in taageerada farsamo iyo dhisidda awoodaha ay noqdaan kuwo dabacsan oo ku saleysan baahida gaarka ah ee Soomaaliya.

UK ayaa sidoo kale sheegtay in ay diyaar u tahay inay sii xoojiso taageerada ay u hayso Soomaaliya, iyadoo golaha ka codsatay in qaraarkan la taageero si loo sii wado iskaashiga iyo horumarinta xuquuqda aadanaha ee Soomaaliya.