Mareykanka oo Malaayiin doollar ku bixinaya Soomaaliya

Safiirka Mareykanka ee Soomaaliya, Richard H. Riley, ayaa sheegay in dowladda Mareykanka ay sanadkan ku bixin doonto $28 milyan oo doolar si loo taageero mashaariic cusub oo lagu horumarinayo adkeynta iyo sugnaanta cuntada ee Soomaaliya.

Mashaariicdan, oo socon doonta muddo shan sano ah, waxay ka faa’iideysan doonaan in ka badan 80,000 oo qoys Soomaaliyeed, kuwaas oo qiyaastii 500,000 qof ka kooban.

Ujeedada mashaariicdaas ayaa ah in la dhiso nolol waarta, la taageero horumarinta dhaqaalaha, iyo kordhinta kaydka iyo hantida qoysaska Soomaaliyeed.

Safiir Riley ayaa sheegay in mashaariicdani ay qeyb ka tahay dadaallada waaweyn ee dowladda Mareykanka ee lagu taageerayo Soomaaliya, gaar ahaan xilliyada adag ee uu wajahayo dalka, iyadoo la tixgelinayo xaaladaha amni ee ka jira gudaha dalka.

Dadaalladan cusub ayaa sidoo kale qayb ka ah taageerada Mareykanka ee horumarka waara ee Soomaaliya, iyadoo la doonayo in la dhiso xasillooni dhaqaale oo waara.

Taageeradan cusub ee Mareykanka ayaa kor u qaadaysa iskaashiga caalamiga ah ee Soomaaliya, iyadoo la filayo in mashaariicda ay kaalin muuqata ka ciyaaraan kor u qaadista nolosha dadka Soomaaliyeed ee ku nool meelaha ay ka jiraan dhibaatooyinka amni iyo cunto yari.