Madaxweyne Xasan oo booqasho ku tagaya Beledweyne

Published January 8, 2025 - Updated January 8, 2025

Akhris 2 daqiiqo ah

Madaxweynaha Dowladda Federaalka Soomaaliya Xasan Sheekh Maxamuud ayaa lagu wadaa in uu booqasho rasmi ah ku tago gobolka Hiiraan si uu uga shaqeeyo xal u helidda khilaafaadka muddada dheer ka dhex taagnaa bulshada deegaanka iyo maamulka Hirshabelle.

Safarka madaxweynaha ee magaalada Beledweyne ayaa imaanaya ka dib booqasho ay horay ugu tageen gobolka Hiiraan Wafdi heer sare ah oo ka socda dowladda federaalka, oo ay ka mid ahaayeen Taliyaha Ciidanka Xoogga Dalka Janaraal Odowaa Yuusuf Raage iyo Agaasimaha Hay’adda Sirdoonka iyo Nabad Sugidda Qaranka (NISA) Cabdullaahi Maxamed Cali (Sanbaloolshe).

Wafdigaasi ayaa heshiis la gaaray hoggaanka beesha Hawadle, kaas oo ku saabsan in ammaanka Beledweyne lagu wareejiyo ciidanka dowladda federaalka, si loo xasiliyo magaalada loona xalliyo arrimaha maamulka.

Intii uu ku sugan yahay, Madaxweyne Xasan Sheekh Maxamuud ayaa kulan la qaadan doona bulshada deegaanka, isaga oo dhagaysan doona cabashooyinkooda, gaar ahaan kuwa la xiriira nidaamka awood-qaybsiga ee Hirshabelle iyo khilaafaadka siyaasadeed ee jira.

Gobolka Hiiraan ayaa waxaa ka taagan caqabado amni oo badan, oo ay ka mid yihiin loollan beeleedyo u dhexeeya kooxo siyaasadeed oo kala duwan, malleeshiyaad hubeysan, iyo muranno ku saleysan qabiil.

Mas’uuliyiinta dowladda federaalka ayaa soo jeediyay in nidaamka amniga la mideeyo si loo hormariyo xasilloonida iyo maamul wanaagga gobolka.

Madaxweyne Xasan oo booqasho ku tagaya Beledweyne

Ka hel Goobjoog wixii cusub.

From the comments