Madaxweyne Xasan Shiikh oo gaaray Addis Ababa

Madaxweynaha Jamhuuriyadda Federaalka Soomaaliya mudane Xasan Shiikh Maxamuud iyo wefdi uu hoggaaminayo ayaa gaaray magaalada Addis Ababa ee caasimadda dalka Itoobiya, halkaas oo ay si weyn ugu soo dhoweeyeen madaxda dalkaasi.

Socdaalka Madaxweynaha Jamhuuriyadda Federaalka Soomaaliya ee dalka Itoobiya ayaa daarra sii ambaqaadidda heshiiskii ay dhowaan labada dal ku gaareen magaalada Ankara ee dalka Turkiga, kaas oo soo afjaray xiisad xooggan oo ku dhowaad sanad ka dhex aloosnayd dowladahan deriska ah.

War qoraal ah oo ay soo saartay madaxtooyada Soomaaliya ayaa Socdaalka Madaxweynaha ee Addis Ababa ku tilmaamay mid looga golleeyahay xoojinta iskaashiga iyo xariirka labada dhinac.

Itoobiya ayaa ah dalka ay Soomaaliya soohdinta ugu dheer ee dhanka dhulka ah la wadaagto, waxaana jira xiisado soo noq noqda ee labada dal si joogto ah u dhex mara, kuwaas oo intooda badan ka dhasha fara-gelinta Itoobiya ee arrimaha gudaha Soomaaliya.