Dowladda UK oo si adag u cambaareysay qaraxii ka dhacay degmada Xamarjajab

Dowladda Ingiriiska ayaa si kulul u cambaareysay weerarkii argagixiso ee maanta ka dhacay isgoyska Ceelgaabta ee degmada Xamar Jajab, Muqdisho, kaas oo lala beegsaday kolonyada gaadiidka Madaxweynaha Soomaaliya.

Weerarkan ayaa sababay dhimashada askar, wariyeyaal, iyo dad shacab ah.

Sida lagu sheegay bayaan ka soo baxay safaaradda UK ee Muqdisho, dowladda Ingiriiska waxay tacsi tiiraanyo leh u dirtay ehellada iyo qaraabada dadka ku naf waayey weerarkan.

Sidoo kale, waxay xaqiijisay inay garab taagan tahay dowladda iyo shacabka Soomaaliyeed dagaalka ay kula jiraan kooxaha argagixisada ah.

Dowladda Ingiriiska ayaa mar kale ku celisay inay sii wadi doonto taageerada ay siiso Soomaaliya, gaar ahaan dhinacyada amniga iyo horumarinta, si loo xaqiijiyo nabad waarta iyo xasillooni.