Dowladda Soomaaliya oo war kasoo saartay Diyaarad shil ku gashay Garoonka Muqdisho

Published April 1, 2025

Akhris 2 daqiiqo ah

Diyaarad nooceedu yahay De Havilland Dash 8 (DH8D) oo ay leedahay UNSOS ayaa la kulantay cillad farsamo oo la xiriirta taayirka hore kadib markii ay ka duushay Garoonka Caalamiga ah ee Aden Cadde 11:16 waqtiga maxalliga ah, iyada oo u socotay magaalada Baydhabo.

Sida lagu sheegay war-saxaafadeed ka soo baxay Hay’adda Duulista Rayidka Soomaaliyeed (SCAA), duuliyeyaasha diyaaradda ayaa dareemay cillada, taasoo keentay in ay go’aansadaan inay dib ugu soo laabtaan garoonka Muqdisho.

“Kadib markii ay ogaadeen arrinta, shaqaalaha duulimaadka waxay go’aansadeen inay dib ugu soo laabtaan Muqdisho iyaga oo raacaya hab-raacyada badbaadada,” ayaa lagu yiri bayaanka SCAA.

Diyaaradda ayaa si badbaado leh ugu soo degatay garoonka Aden Cadde iyada oo aanay taayiradeedu shaqaynin, taasoo loo yaqaan ‘belly landing’, waxaana la xaqiijiyay in aysan jirin wax khasaare ah oo ka dhashay dhacdadan.

Sida laga soo xigtay SCAA, “diyaaraddu waxay si ammaan ah ugu soo degtay garoonka 13:28 waqtiga maxalliga ah, mana jiraan wax dhaawacyo ah, halka khasaarihuna uu yahay mid aad u yar.”

Mas’uuliyiinta garoonka ayaa ku howlan ka saarista diyaaradda laamiga si howlihii duulimaadyadu caadi ugu soo noqdaan saddexda saacadood ee soo socda.

Dowladda Soomaaliya oo war kasoo saartay Diyaarad shil ku gashay Garoonka Muqdisho

Ka hel Goobjoog wixii cusub.

From the comments