Ra’iisul Wasaaraha Soomaaliya oo Si Diirran Loogu Soo Dhaweeyay Magaalada Laascaanood

Published April 12, 2025

Akhris 2 daqiiqo ah

Ra’iisul Wasaaraha Soomaaliya, Mudane Xamse Cabdi Barre, ayaa maanta si rasmi ah uga degay magaalada Laascaanood ee gobolka Sool, halkaas oo si heer sare ah loogu soo dhaweeyay. Booqashadan ayaa noqoneysa tii ugu sarreysay ee uu ku tago magaalada tan iyo markii loo magacaabay xilka Ra’iisul Wasaaraha.

Markii uu ka degay garoonka diyaaradaha ee Laascaanood, waxaa si sharaf leh u qaabilay mas’uuliyiin heer gobol iyo heer federaal ah, waxaana uu salaan sharaf ka qaatay cutub ka tirsan ciidanka xoogga dalka Soomaaliyeed . Ciidanku waxay muujiyeen heegan iyo niyad-wanaag sare oo ka tarjumaya xaaladda amni ee gobolka.

Kumanaan qof oo shacabka reer Laascaanood ah ayaa isugu soo baxay waddooyinka waaweyn ee magaalada si ay u muujiyaan taageeradooda iyo soo dhaweyntooda Ra’iisul Wasaaraha.

Dadka deegaanka ayaa muujiyay dareen ay ku muujinayaan rajo, isbedel, iyo taageero buuxda oo ay u hayaan dowladda dhexe.

RW Xamse Cabdi Barre ayaa sidoo kale salaan gaar ah la yeeshay dadkii soo dhaweeyay, oo ay ka mid yihiin xubno ka tirsan Golaha Wasiirada Federaalka, madaxda heer gobol, odayaal dhaqameed, haween, iyo dhalinyaro.

Booqashadan ayaa lagu tilmaamay mid taariikhi ah oo dhabbaha u xaaraysa xoojinta wada-shaqeynta dowladda federaalka iyo shacabka gobollada Waqooyi ee dalka.

Ra’iisul Wasaaruhu waxa uu filayaa inuu kulamo la yeesho qaybaha kala duwan ee bulshada si uu u dhageysto aragtidooda, islamarkaana uu uga warbixiyo qorshayaasha dowladda ee ku aaddan horumarka, dib u heshiisiinta, iyo xoojinta adeegyada dowladda ee dalka oo dhan.

Ra’iisul Wasaaraha Soomaaliya oo Si Diirran Loogu Soo Dhaweeyay Magaalada Laascaanood

Ka hel Goobjoog wixii cusub.

From the comments