Booliska Gobolka Nugaal oo gacanta ku dhigay nin loo haysto dilka ka dhacay Garoowe 

Ciidanka booliiska gobolka Nugaal ee dowlad goboleedka Puntland ayaa gacanta ku dhigay eedeysane loo haysto fal dil ah oo saacadihii la soo dhaafay ka dhacay magaalada Garoowe.

War saxaafadeed ka soo baxay Taliska Booliska Puntland ayaa lagu yiri “Ciidanka Booliska Puntland, gaar ahaan Taliska Qaybta Booliska Gobolka Nugaal, ayaa xaqiijiyey in laamaha amniga ay ku guuleysteen in ay gacanta ku soo dhigeen eedaysane loo haysto fal dil ah oo ka dhacay magaalada Garoowe.

Falkaasi ayaa dhacay caawa oo ay taariikhdu tahay 09 May 2025, saacadda markay ahayd 07:45 habeenimo, waxaana uu ka dhacay jidka Sodonka, agagaarka shirkadda NEC ee magaalada Garoowe.

Eedeysanaha falka dilka ah loo haysto ayaa ciidamada ammaanku ku qabteen howlgal degdeg ah, waxaana uu haatan ku xiran yahay saldhigga Booliska.

Baaritaanka kiiskan waxaa si toos ah gacanta ugu haya Ciidanka Baarista Dembiyada (CID) ee Gobolka Nugaal, kuwaas oo wada baaritaanno qoto dheer si loo xaqiijiyo faahfaahinta dhacdada iyo cid kasta oo suurtagal ah in ay arrintan la xiriirto”.