Madaxweyne Xasan Sheekh: “Haddii Doorasho Dadban la Aado Waa Lagu isku dilaya “

Madaxweynaha Soomaaliya, Mudane Xasan Sheekh Maxamuud, ayaa hadal kulul ka jeediyay munaasabadda xuska maalinta dhallinyarada 15-ka May, isagoo si cad uga digay in dalka dib loogu celiyo doorasho dadban.

Madaxweynaha ayaa hoosta ka xariiqay in xal waara uu yahay doorashada qof iyo cod ah, taasoo uu sheegay in ay tahay waddada kaliya ee lagu gaari karo cadaalad iyo deganaansho siyaasadeed.

Madaxweynaha ayaa yiri:
“Xildhibaannadii labada saacadood jeebka lagu soo ridanayey, kuwii soo xushay kama faa’iidin. Bal maxay mar kale ku falayaan! Waa laysku dilayaa markaan, dadkii la boobay mar kale lama boobi karo.”

Hadalkan ayaa imaanaya xilli siyaasadda dalka ay mar kale wajahayso dood adag oo la xiriirta habka doorasho ee sanadaha soo socda. Madaxweyne Xasan Sheekh ayaa carrabka ku adkeeyay in nidaamkii hore ee doorashada dadban uu ahaa mid sababay khilaaf, kalsooni-darro iyo cabasho ka dhalatay qaabka loo xulay xildhibaannada.

Isagoo la hadlayay dhallinyarada, ayuu sidoo kale xusay in da’yartu ay yihiin hormuudka isbeddelka, islamarkaana ay yihiin kuwa laga rabo in ay taageeraan hirgelinta nidaamka dimuqraadiyadeed ee salka ku haya codka shacabka.