Dalalka Carabta oo Si Wadajir ah u Cambaareeyay Weerarkii Argagixiso ee Ka Dhacay Muqdisho
Muqdisho – Dowladaha Carabta ayaa si isku mid ah u cambaareeyay weerarkii argagixiso ee lagu qaaday xerada milatari ee Damanyo ee ku taalla caasimadda Soomaaliya, Muqdisho, kaasoo sababay dhimasho iyo dhaawacyo badan. Weerarkan ayaa si weyn loogu dhaleeceeyay war-saxaafadeedyo kasoo kala baxay dowladaha Kuwait, Bahrain, Imaaraadka Carabta, Qatar iyo Masar.
Dowladda Kuwait ayaa sheegtay in ay si xooggan u cambaareyneyso weerarka, iyadoo mar kale ku celisay mowqifkeeda cad ee ka dhanka ah dhammaan noocyada rabshadaha iyo argagaxisada. War-saxaafadeedka ayaa sidoo kale xusay muhiimadda ay leedahay in la mideeyo dadaallada caalamiga ah ee lagula dagaallamayo ilaha argagixisada iyo wax kasta oo waxyeello u geysanaya xasilloonida gobolka iyo tan caalamka.
Dhankeeda, Boqortooyada Bahrain ayaa muujisay tiiraanyo iyo murugo ay la qaybsatay shacabka Soomaaliyeed, waxayna u dirtay tacsi qoysaska dadkii ku naf waayey weerarka. Bahrain waxay adkaysay garab istaaggeeda Soomaaliya, iyadoo ku baaqday in la xoojiyo la dagaallanka xagjirnimada iyo kooxaha amni-darrada abuuraya.
Sidoo kale, Isutagga Imaaraadka Carabta (UAE) ayaa si kulul u cambaareeyay weerarka, iyagoo ku tilmaamay ficil danbi ah oo lagu carqaladeynayo amniga iyo xasilloonida Soomaaliya, isla markaana baal marsan xeerarka caalamiga ah. UAE waxay carrabka ku adkeysay in ay si buuxda u diidan tahay dhammaan noocyada argagixisada iyo rabshadaha.
Dowladda Qatar ayaa si la mid ah u muujisay cambaareyn adag oo ay u jeedisay weerarka, waxayna mar kale ku celisay mowqifkeeda joogtada ah ee ka dhanka ah argagixisada, iyadoo aan loo eegayn ujeedada ama sababta ka dambeysa. Qatar waxay tacsiyo u dirtay dowladda Soomaaliya iyo shacabka Soomaaliyeed, waxayna u rajeysay dhaawacyada in ay si degdeg ah u bogsadaan.
Ugu dambeyn, Dowladda Masar ayaa sheegtay in weerarkani uu ahaa fal argagixiso oo wax u dhimaya dadaallada lagu sugayo amniga Soomaaliya. Masar waxay caddeysay taageeradeeda joogtada ah ee la xiriirta xasilloonida iyo dagaalka lagula jiro argagixisada ee Soomaaliya.
Dowladahaan Carbeed ee walaalaha ah ayaa muujiyay midnimo iyo garab istaag buuxa oo ay la garab taagan yihiin shacabka Soomaaliyeed iyo dowladdooda, iyagoo ka wada hadlay muhiimadda ay leedahay in si wadajir ah loogu hortago wax kasta oo khatar ku ah nabadda, amniga iyo horumarka Soomaaliya.