War Degdeg ah: Hoobiyeyaal Lagu Garaacay Xalane

Muqdisho – Wararka naga soo gaaraya degmada Wadajir ee Muqdisho ayaa sheegaya in ilaa afar hoobiye lagu garaacay xayndaabka Xalane, oo ah aagga ay ku yaalliin xarumo muhiim ah oo ay degan yihiin safaarado iyo ciidamada Midowga Afrika  iyo kuwa caalamiga ah.

Goobjoogayaal ku sugan meel u dhow Xalane ayaa xaqiijiyay inay maqleen jugo culus oo la rumeysan yahay inay yihiin hoobiyeyaal, kuwaasoo ku dhacay gudaha xayndaabka ama hareerihiisa.

Ilaa hadda lama xaqiijin khasaaraha rasmiga ah, mana jiro wax war ah oo kasoo baxay hay’adaha ammaanka ee Soomaaliya ama kuwa caalamiga ah ee halkaas ku sugan.

Weerarada noocan oo kale ah ayaa ah kuwo mararka qaar laga fuliyo gudaha magaalada. Waxaa maalmihii lasoo dhaafay kordhay hoobiyeyaasha aagga Garoonka Aadan Cadde ku dhacaya, iyadoo booliska Soomaaliya ay waddaan dadaallo ku aadan ka hortagida falalka Amni daro.