Shirkii Ugu Horreeyay ee u Dhaxeeya Madaxweyne Xasan Sheekh iyo Madasha Samata-bixinta Mucaaradka oo ka Furmay Villa Somalia

Muqdisho – Goordhow ayaa waxaa si rasmi ah shir uga furmay Madaxtooyada Villa Somalia, kaas oo u dhaxeeya Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, iyo xubnaha Madasha Samata-bixinta Mucaaradka.

Shirkan ayaa ah kii ugu horreeyay ee noociisa ah tan iyo markii Madasha Samata-bixinta lagu dhawaaqay shir jaraa’id oo ka dhacay Hotel Jazeera. Madashu waxay horey u muujisay cabashooyin xoogan oo la xiriira isbeddelka lagu sameeyay dastuurka iyo habraaca doorashooyinka dalka, iyaga oo xilligaa codsaday in Madaxweynaha uu ka laabto arrimahaas laguna heshiiyo hanaan mideysan.

Kulankan maanta furmay ayaa yimid kaddib codsi rasmi ah oo Madaxweynaha ka yimid, kaasoo Madashu ay aqbashay inkasta oo ay horey u qaadaceen gogoshii siyaasadeed ee uu Madaxweynuhu hore ugu martiqaaday siyaasiyiinta, taasoo ka dhacday Hotel Decale.

Wararka laga helayo ilo ku dhow kulanka ayaa sheegaya in uu yahay mid diiradda lagu saarayo:

Arrimaha doorashada

Muranka ka taagan wax ka beddelka dastuurka

Dardar-gelinta hanaanka wada-hadalka siyaasadeed

Abuuridda jawi isu tanaasul leh oo dalka looga samata bixin karo khilaafka siyaasadeed

Shirkan ayaa lagu wadaa inuu gogol xaar u noqdo wadahadallo rasmi ah oo dhex mara Villa Somalia iyo xubnaha mucaaradka ee ku midoobay Madasha Samata-bixinta.