Ra’iisul Wasaaraha Qatar oo Qaabilay Madaxweyne Cirro

Ra’iisul Wasaaraha Dowladda Qatar ahna Wasiirka Arrimaha Dibadda Sheikh Mohammed bin Abdulrahman Al-Thani ayaa maanta si rasmi ah ugu qaabilay magaalada Doha Madaxweynaha Somaliland, Mudane Cabdiraxmaan MaxamedCabdillaahi(Cirro), oo booqasho rasmi ah ku jooga dalkaasi.

Kulanka labada mas’uul ayaa diiradda lagu saaray xoojinta xiriirka labada dhinac, horumarinta iskaashiga dhinacyada ganacsiga, maalgashiga, tamarta, iyo arrimaha bini’aadantinimada.

Ra’iisul Wasaaraha Qatar ayaa dhankiisa bogaadiyay dadaallada nabadeed ee ka socda Geeska Afrika, isaga oo ballanqaaday in Qatar diyaar u tahay inay kaalin muuqata ka qaadato horumarinta dhaqaalaha Somaliland, gaar ahaan dhismaha kaabeyaasha dhaqaalaha.

Booqashada Madaxweyne Cirro ee Qatar ayaa la filayaa in ay socoto muddo dhowr maalmood ah, iyadoo uu kulamo la yeelan doono mas’uuliyiin kale oo sare oo ka tirsan dowladda Qatar iyo ganacsato doonaya in ay maalgashi ka sameeyaan gobolka.

Waa markii ugu horreysay ee Madaxweyne Cirro si rasmi ah loogu casuumo dalka Qatar tan iyo markii loo doortay hoggaanka Somaliland horraantii 2025.