Iran oo wada-hadallo cusub la galaysa dalalka Yurub

Dowladda Iran ayaa wada-hadallo cusub la galaysa midowga yurub, ayadoo laga arrinsanayo barnaamijka nukliyeerka dalkaas todobaadyo uun ka dib dagaalkii dhex maray Israa’iil iyo Tehran iyo duqeymihii Mareykanka ee xarumaha Nukliyeerka Iran.

TV-ga dowladda Iran ayaa sheegay in Tehran ay ogolaatay in ay ka qeyb-gasho wareeg cusub oo wada xaajood ah, kaas oo ay la yeelanayso dalalka Britain, Jarmalka, iyo Faransiiska, iyada oo laga jawaabayo codsiga Yurub.

wareegga cusub ee wada-xaajoodka saddexdan dal iyo Iran ayaa jimcaha soo socda lagu qaban doono magaalada Istanbul.

Kulankan oo ay isugu imaan doonaan wasiir ku xigeennada arrimaha dibadda ayaa waxaa diiradda lagu saari doonaa barnaamijka Nukliyeerka ee dalka Iran, sida ay xaqiijisay warbaahinta rasmiga ah ee dalkaasi.

Iran ayaa horay u sheegtay inaysan wax gorgortan ah ka geli doonin barnaamijkeeda Nuclear-ka, yadoo weerarkii Mareykanka ee xarumeheeda ka dib billowday dayac-tir degdeg ah.