Dowladda Federaalka oo ku dhawaaqday in Dastuurka Maamulka Waqooyi Bari uu dhaqan galay

Wasiirka Arrimaha Gudaha ee Dowladda Federaalka Soomaaliya, Cali Yusuf Cali (Cali Xoosh), ayaa shaaca ka qaaday in Dastuurka Maamulka Waqooyi Bari uu si rasmi ah u dhaqan galay, taasoo u gogol xaaraysa in la guda galo marxaladaha xiga ee dhismaha maamulkaasi.

Wasiir Cali Xoosh oo ka hadlay munaasabad rasmi ah ayaa sheegay in tallaabada ugu dhow ay noqon doonto qabashada doorashooyin lagu soo dooranayo Madaxweynaha Maamulka Waqooyi Bari iyo ku xigeenkiisa, isagoo xusay in howlahani ay yihiin kuwo socda oo aan dib uga laaban doonin.

“Dastuurka Maamulka Waqooyi Bari waa dhaqan galay, waxaana xigi doona doorashada Madaxweynaha iyo ku xigeenkiisa, howlahana waa sii socon doonaan,” ayuu yiri wasiirku.

Arrintan ayaa kusoo beegmaysa xilli dadaallo xooggan ay socdaan si loo dardargeliyo dhismaha maamullo deegaan oo cusub oo ka mid noqon doona nidaamka federaalka Soomaaliya.

Qaar ka mid ah siyaasiyiinta iyo shacabka Waqooyi Bari ayaa si diirran u soo dhaweeyay tallaabadan, iyagoo ku tilmaamay fursad muhiim u ah horumarka gobolka.

Dowladda Federaalka ayaa horey u ballan qaaday in ay taageeri doonto dadaallada dhismaha maamullo cusub, si loo helo nidaam daahfuran oo matala dhammaan bulshada Soomaaliyeed.

Waxaa la filayaa in guddiyo doorasho la magacaabo, iyadoo ay socdaan kulamo siyaasadeed iyo wadatashi ku saabsan habraaca doorashooyinka la filayo in dhawaan la qabto.