dowladda Suuriya iyo xoogagga kurdish-ka oo eedeymo kulul is dhaafsaday

Wasaaradda Gaashaandhigga Suuriya iyo ciidamada Kurdish-ka hoggaamiya ee (SDF) ayaa isugu eedeeyay weerar ka dhacay magaalada Manbij ee waqooyiga Suuriya maalintii Sabtidii, arrintaas oo mugdi gelisay heshiis muhiim ah oo ay wada saxiixdeen bishii Maarso.

Wasaaradda Gaashaandhigga Suuriya ayaa ku eedeysay SDF inay weerar gantaallo ah ku qaadeen saldhig ciidamada dowladdu leeyihiin oo ku yaalla duleedka magaaladaas, taasoo keentay dhaawaca afar askari iyo saddex rayid, sida ay sheegtay wakaaladda wararka dowladda ee SANA.

Weerarkaasi waxaa lagu tilmaamay mid masuuliyad darro oo aan wax sabab ah loo haynin, balse SDF oo taageero ka hesha Mareykanka ayaa bayaan ay soo saartay ku sheegtay inay ka jawaabeen weerar madaafiic ah oo si lama filaan ah lagu bartilmaameedsaday deegaanno ay dad rayid ah ku nool yihiin,taasoo lagu garaacay in ka badan toban madfac, sida ay sheegeen.

Bishii Maarso, SDF waxay heshiis la saxiixatay dowladda Dimishiq ee uu hoggaamiya Axmed Sharac si ay ugu biiraan hay’adaha dowladda Suuriya, ayadoo ujeeddada heshiiskaasi ay ahayd in dib loogu mideeyo dalka Suuriya oo ay colaado muddo 14 sano ah socday burburiyeen, waxayna taasi horseedi lahayd in ciidamada SDF iyo maamulka Kurdish ee gobolladaasi ay la midoobaan dowladda dhexe ee Suuriya.

Si kastaba ha ahaatee, heshiiskaasi ma caddeyn qaabka ay ciidamada SDF ugu biiri doonaan ciidamada dowladda, ayadoo SDF ay horay u sheegtay in ay doonayaan inay ku biiraan iyaga oo koox ahaan, halka dowladda Suuriya ay rabto inay askartu ku biiraan si gaar ah.