MUQDISHO — Iyadoo ay guryeyso saacadda loo ballansan yahay dhammaadka muddo-xileedka hoggaanka dalka, waxaa caasimadda Muqdisho ka socda dhaqdhaqaaqyo siyaasadeed oo xooggan.
Xubnaha mucaaradka ayaa maanta isugu yimid kulan xasaasi ah oo ay ku goobayaan nidaam doorasho oo ka duwan midka “Qof iyo Cod” ee dowladda federaalku riixayso iyo nidaamkii dadbanaa ee sanadkii 2022.
Raadinta Xal Macquul Ah
Mucaaradka ayaa doonaya inay soo bandhigaan qorshe loo arki karo “Waddo Saddexaad” ama nooc doorasho oo dhex-u-yaal ah.
Sida ay sheegayaan ilo wareedyo ku dhow kulanka, sababta looga fogaanayo nidaamka “Qof iyo Cod” ayaa ah in loo arko mid aan xilligan farsamo ahaan iyo ammaan ahaanba dalka ka hirgali karin ka hor bisha May.
Dhinaca kale, mucaaradku waxay rabaan inay ka gudbaan nidaamkii 2022 si loo helo hannaan ka casrisan kii hore, balse ka sahlan kan tooska ah, kaas oo u cuntami kara dhammaan dhinacyada isku haya saaxadda siyaasadda.
Faragelinta Beesha Caalamka iyo Culayska Waqtiga
Kulankan ayaa imaanaya xilli ay ergada Beesha Caalamka labalaabeen dadaallada dhexdhexaadinta.
Diblomaasiyiinta shisheeye ayaa todobaadyadii u dambeeyay kulamo gooni-gooni ah la yeelanayay Madaxweyne Xasan Sheekh Maxamuud iyo madaxda mucaaradka, iyagoo ku boorinaya inaan dalka lagu ridin firaaq dastuuri ah.
Farriinta Beesha Caalamku waa mid cad: Waa in heshiis laga gaaraa hannaanka doorashada ka hor 15-ka May. Hindisaha ay hadda diyaarinayaan mucaaradka ayaa loo arkaa inuu yahay dukumiintiga ay u dhiibi doonaan ergada caalamiga ah si loogu qanciyo dowladda in laga tanaasulo qorshaha “Qof iyo Cod” ee muranka dhaliyay.
Maxaa miiska u saaran Mucaaradka?
Hadafka ugu weyn ee shirkooda maanta waa inay hal mowqif ka istaagaan qodobbada soo socda:
- Soo bandhigidda hannaan doorasho oo ka kalsooni badan kii hore balse la fulin karo waqti kooban gudihiis.
- Xaqiijinta in loo dhan yahay go’aannada masiiriga ah ee dalka si looga baaqsado qalalaase siyaasadeed.
- U diyaar-garowga wadahadal fool-ka-fool ah oo ay la galaan dowladda federaalka iyadoo la kaashanayo dhexdhexaadiyaasha caalamiga ah.
Marka la eego xaaladda murgacsan ee siyaasadda Soomaaliya, qorshahan “Dhex-u-yaalka” ah ee ay mucaaradku wadaan wuxuu noqon karaa furaha kaliya ee furi kara albaabka is-mari-waaga, haddii ay dowladda iyo maamul-goboleedyadu u arkaan mid u adeegaya xasilloonida dalka.