Ciidanka Xoogga Dalka Soomaaliyeed oo kaashanaya saaxiibada caalamka ayaa howlgal qorsheysan ka fuliyay deegaanka Ugunji ee gobolka Shabeellaha Hoose, halkaas oo lagu bartilmaameedsaday maleeshiyaad ka tirsan Al-Shabaab oo isku uruursanayey abaabul ay ku doonayeen inay ku dhibaateeyaan shacabka Soomaaliyeed.
War-saxaafadeed kasoo baxay Wasaaradda Gaashaandhigga ayaa lagu sheegay in howlgalka lagu dilay lix xubnood oo ka tirsan Al-Shabaab, isla markaana lagu burburiyay hub iyo agab ay maleeshiyaadku adeegsanayeen.
Wasaaraddu waxay sheegtay in ciidamada dowladda ay sii wadi doonaan howlgallada ka dhanka ah kooxda Al-Shabaab, iyadoo shacabka loogu baaqay inay taageeraan dadaallada lagu xaqiijinayo amniga iyo xasilloonida dalka.
Sidoo kale, dowladda Soomaaliya ayaa adkaysay in la labanlaabi doono gulufka ka dhanka ah Al-Shabaab si looga ciribtiro khatarta ay ku hayaan shacabka Soomaaliyeed.