Dhoofinta qaadka Kenya ee loo suuq geeyo Soomaaliya ayaa hoos u dhacday saddexdii bilood ee ugu dambeysay, iyadoo uu sii xoogeysanayo tartanka uga imaanaya qaadka Itoobiya oo si isa soo taraysa uga qabsanaya suuqyada Soomaaliya.
Warbixin cusub oo ay soo saartay Hay’adda Beeraha iyo Cuntada Kenya ayaa muujisay in Soomaaliya ay weli tahay suuqa ugu weyn ee qaadka Kenya iyo il muhiim ah oo dalkaasi uu ka helo lacagaha qalaad, balse tartanka sii kordhaya ee ka imanaya Itoobiya uu saameyn ku yeeshay dhoofinta Kenya.
Sida lagu sheegay warbixinta, Kenya ayaa muddadii la qiimeeyay dhoofisay 692,000 oo kiiloogaraam oo qaad ah, kuwaas oo lagu qiimeeyay 3.09 bilyan oo shilin Kenya ah. Tani waxay ka dhigan tahay hoos u dhac dhan 103,668 kiiloogaraam iyo qiyaastii 470 milyan oo shilin marka loo barbardhigo isla muddadii sanadkii 2025.
Mas’uuliyiinta Kenya ayaa hoos u dhacaasi ku sababeeyay tartanka adag ee ka jira suuqa Soomaaliya, kaas oo muddo dheer ahaa meesha ugu weyn ee qaadka Kenya loo iib geeyo. Warbixintu waxay sidoo kale xustay in qaar kamid ah beeraleyda Kenya ay dib u dhigeen goosashada dalagyadooda iyagoo sugaya in qiimaha suuqu kor u kaco.
Dhanka kale, qaadka Itoobiya ayaa si weyn u soo jiitay ganacsatada Soomaaliyeed, iyadoo masaafada gaaban ee u dhexeysa Itoobiya iyo Soomaaliya ay sahashay in qaadka si dhaqso leh oo cusub uu ku gaaro suuqyada, isla markaana uu hoos u dhaco kharashka gaadiidka iyo saadka.
Hay’adda Beeraha iyo Cuntada Kenya ayaa ugu baaqday dhoofiyeyaasha iyo dowladda Kenya inay raadiyaan suuqyo cusub oo ka baxsan Soomaaliya, isla markaana ay horumariyaan hababka kaydinta, gaadiidka iyo heshiisyada ganacsi si loo xoojiyo tartanka gobolka.
Warbixintu waxay muujineysaa in Soomaaliya ay weli tahay suuqa ugu weyn ee qaadka Geeska Afrika, halka tartanka u dhexeeya Kenya iyo Itoobiya uu dib u qaabeynayo ganacsiga qaadka ee gobolka.
From the comments