Dowladda Federaalka Soomaaliya ayaa mar kale ku dhawaaqday qorshe ay dib ugu hawlgelinayso shirkadda diyaaradaha qaranka ee Somali Airlines, iyadoo la sheegay in duulimaadyada tooska ah la bilaabi doono bisha Sebtembar 2026.
Maareeyaha Hay’adda duulista Rayidka ah ee Soomaaliya Axmed Macallin ayaa sheegay in diyaar-garowgii loo baahnaa la soo dhammaystiray, duulimaadyada diyaaradduna la filayo inay dhowaan billowdaan.
Somali Airlines ayaa duulimaadyadii joojisay 1991-kii, waxaana muddo ka badan 35 sano Soomaaliya aysan lahayn shirkad diyaaradeed oo qaran oo si buuxda u shaqeysa.
Bishii Luulyo 2025 ayay dowladda sheegtay inay qaaday tallaabo muhiim ah oo dib loogu soo celinayo shirkadda, kadib markii la shaaciyay heshiis lagu helayo laba diyaaradood oo nooca Airbus A320 ah.
Hase yeeshee, ballanqaadka cusub ee Sebtembar wuxuu kusoo beegmayaa iyadoo dowladda horey dhowr jeer u sheegtay in Somali Airlines ay bilaabi doonto duulimaadyo.
Bishii Oktoobar 2025, Wasiirka Gaadiidka iyo Duulista Hawada ayaa sheegay in shirkaddu dib u bilaabi doonto hawlaheeda ka hor dhammaadka sanadkaas, halka warbixinno kale ay xilligaas tilmaamayeen in diyaar-garowgii hawlgelinta uu marayay heer gabagabo ah.
Si kastaba, dib-u-hawlgelinta shirkad diyaaradeed kuma koobna oo keliya helitaanka diyaarado, balse Waxaa loo baahan yahay in la xaqiijiyo shuruudaha badbaadada iyo rukhsadaha hawlgalka, shaqaale tababaran, dayactir joogto ah, caymis, qorshaha duulimaadyada iyo heshiisyada lagama maarmaanka u ah garoomada ay diyaaradaha ku degayaan.