Ciidanka XDS oo sheegay inay fashiliyeen weerar lagu qaaday Baydhabo

Published August 17, 2026 - Updated August 17, 2026

Akhris 2 daqiiqo ah

Ciidanka Xoogga Dalka Soomaaliyeed (XDS) ayaa sheegay inay fashiliyeen weerar ay Al-Shabaab ku qaadeen magaalada Baydhabo, oo ah caasimadda ku-meelgaarka ah ee Dowlad-goboleedka Koonfur Galbeed Soomaaliya.

Sida lagu sheegay war-saxaafadeed ay soo saartay Taliska Ciidanka XDS, maleeshiyaadka ayaa muddo isku dayayay inay qalqal geliyaan amniga iyo xasilloonida magaalada Baydhabo, xilli magaalada iyo guud ahaan deegaanada Koonfur Galbeed ay ka jireen dhaqdhaqaaqyo amni oo ay ciidamadu ku tilmaameen kuwo khatar ku ah shacabka.

Taliska ayaa sheegay in ciidamada dowladda ay si buuxda uga hortageen weerarka, isla markaana ay iska caabin xooggan kala hor tageen kooxihii soo weeraray.

Si kastaba, Taliska XDS ma uusan shaacin tirada rasmiga ah ee dadka lagu dilay ama lagu dhaawacay iska horimaadka, sidoo kalena ma jiraan xog madax-bannaan oo hadda si buuxda u xaqiijinaysa baaxadda khasaaraha ay labada dhinac kala gaareen.

Taliska Ciidanka XDS ayaa sidoo kale sheegay in ciidamada dowladda ay sii wadi doonaan howlaha amniga iyo sugidda xasilloonida Baydhabo, iyadoo shacabka magaalada iyo guud ahaan bulshada Soomaaliyeed loogu baaqay inay muujiyaan feejignaan iyo wada-shaqeyn ay la yeeshaan ciidamada ammaanka.

Ciidanka XDS oo sheegay inay fashiliyeen weerar lagu qaaday Baydhabo

Ka hel Goobjoog wixii cusub.

From the comments