MUQDISHO (Goobjoog News) — Ra’iisul Wasaaraha Xukuumadda Federaalka Soomaaliya, Mudane Xamsa Cabdi Barre, ayaa magaalada Muqdisho ku qaabilay wafdi ballaaran oo ka socday Ururka Iskaashiga Islaamka (OIC), kaas oo uu hoggaaminayay Agaasimaha Guud ee Xafiiska OIC ee Soomaaliya, Danjire Maxamed Bamba M. Boba. Kulankan ayaa diiradda lagu saaray xoojinta xiriirka iyo iskaashiga labada dhinac, iyadoo la falanqeeyay qaababka ururku u kordhin karo taageerada uu siiyo dowlad-dhiska Soomaaliya.
Intii uu kulanku socday, Ra’iisul Wasaaraha ayaa wafdiga siiyay warbixin faahfaahsan oo ku saabsan xaaladda guud ee dalka iyo tallaabooyinka wax-ku-oolka ah ee laga gaaray dhinacyada amniga, dib-u-dhiska dowladnimada, xasiloonida siyaasadda, iyo horumarinta dhaqaalaha qaranka. Waxa uu sidoo kale iftiimiyay sida xukuumaddu ay uga go’an tahay dardargelinta qorshe-hawleedka lagu hirgelinayo nidaamka doorashooyinka qof iyo cod ah oo ka bilaawday qeybo ka mid ah dalka.
Dhinaca kale, Ra’iisul Wasaare Xamsa Cabdi Barre ayaa uga mahadceliyay Ururka Iskaashiga Islaamka taageerada joogtada ah iyo garab-istaagga walaalnimo ee ay mar walba la garab taagan yihiin ummadda Soomaaliyeed. Wuxuu si gaar ah u bogaadiyay dadaallada baaxadda leh ee OIC ay ku bixiso taabbagelinta dadaallada nabadda, dhismaha hay’adaha dowliga ah, iyo kobcinta adeegyada horumarineed ee dalka ka socda.
Wafdiga OIC ayaa dhankooda caddeeyay inay sii wadi doonaan wada-shaqeynta dhow ee ay la leeyihiin Dowladda Federaalka Soomaaliya, iyagoo xusay muhiimadda ay leedahay in la xoojiyo barnaamijyada wax looga qabanayo baahiyaha aasaasiga ah iyo taageeridda dadaallada lagu gaarayo xasilooni waarta oo ka dhalata guud ahaan gobolka.