Falalka burcad-badeedda ee ka dhacaya xeebaha Soomaaliya ayaa gaaray heerkii ugu sarreeyey muddo toban sano ah, iyadoo tan iyo dabayaaqadii bishii Abriil la diiwaangeliyey siddeed afduub oo loo geystay maraakiib ganacsi iyo doonyo marayey biyaha Geeska Afrika.
Kooxaha burcad-badeedda ayaa la sheegay inay hadda adeegsanayaan farsamooyin ka casrisan kuwii hore, oo ay ka mid yihiin internet-ka dayax-gacmeedka si ay ula socdaan bartilmaameedyada una xiriiriyaan hawlgalladooda.
Waxay sidoo kale maraakiibtii hore loo afduubay u adeegsanayaan saldhigyo ay weerarro kale uga fuliyaan badda.
Soo-noqoshada burcad-badeedda waxaa lala xiriiriyey yaraanshaha joogitaanka maraakiibta dagaalka caalamiga ah ee xeebaha Soomaaliya. Qaar ka mid ah awoodihii badda ayaa xoogooda iyo agabkooda u wareejiyey xiisadaha ka taagan Badda Cas iyo marinnada kale ee istaraatiijiga ah ee gobolka.
Lacagaha madax-furashada ee la sheegay in lagu bixiyo sii-deynta maraakiibta iyo shaqaalahooda ayaa sidoo kale sare u qaaday walaaca jira. Saraakiil iyo khubaro dhanka amniga badda ah ayaa ka digay in lacagahaas ay dhiirrigelin karaan kooxaha burcad-badeedda, isla markaana ay u sahli karaan inay dib isu abaabulaan.
Burcad-badeedda Soomaaliya ayaa heerkii ugu sarreeyey gaartay sannadkii 2011, markaas oo boqollaal weerar laga diiwaangeliyey biyaha Soomaaliya.
Weerarrada ayaa si weyn hoos ugu dhacay kaddib markii la geeyey ciidamo caalami ah, maraakiibtuna xoojiyeen ilaaladooda, balse dhacdooyinka ayaa mar kale soo badanayey tan iyo 2023.