Maamulka Somaliland oo sheegay inuu warqadaha aqoonsiga ka guddoomay safiir beenaad ay Israa’iil u soo magacawday

Published November 1, 2026 - Updated November 1, 2026

Akhris 2 daqiiqo ah

HARGEYSA (Goobjoog News) – Maamulka Somaliland, oo ka tirsan Jamhuuriyadda Federaalka Soomaaliya, ayaa sheegay in Madaxweynaha maamulkaas, Cabdiraxmaan Maxamed Cabdillaahi (Cirro), uu warqadaha aqoonsiga ka guddoomay Michael Lotem oo ay ku tilmaameen safiirka Israa’iil u qaabilsan Somaliland.

Munaasabad ka dhacday xarunta Madaxtooyada maamulka Somaliland ayuu Cirro ku qaabilay Michael Lotem, isaga oo tallaabadan ku tilmaamay mid lagu xoojinayo xiriirka iyo iskaashiga maamulka Somaliland iyo Israa’iil.

Cirro ayaa sheegay in maamulkiisu doonayo inuu Israa’iil kala yeesho iskaashi dhinacyada siyaasadda, ganacsiga, maalgashiga, amniga, difaaca iyo tiknoolajiyadda, isaga oo sidoo kale xusay muhiimadda istaraatiijiyadeed ee goobta Somaliland kaga taallo Badda Cas iyo Gacanka Cadmeed.

Dhankiisa, Michael Lotem ayaa sheegay inuu ka shaqayn doono xoojinta xiriirka labada dhinac, gaar ahaan dhinacyada amniga, difaaca, ganacsiga, maalgashiga, caafimaadka iyo waxbarashada.

Tallaabadan ayaa dhalinaysa su’aalo la xiriira awoodda maamulka Somaliland u leeyahay inuu si madax-bannaan u sameeyo xiriirro diblomaasiyadeed iyo heshiisyo caalami ah, maadaama Somaliland ay qayb ka tahay Jamhuuriyadda Federaalka Soomaaliya, arrimaha siyaasadda dibadda ee dalkana ay hoos yimaadaan dowladda federaalka.

Maamulka Somaliland oo sheegay inuu warqadaha aqoonsiga ka guddoomay safiir beenaad ay Israa’iil u soo magacawday

Ka hel Goobjoog wixii cusub.

From the comments