Kenya Iyo Itoobiya Oo Laga Codsaday Inay Diyaarado Dagaal Ugu Deeqaan AMISOM

Ururuka Midowga Afrika ayaa dalalka Kenya iyo Itoobiya waxa uu ka codsaday in ay ugu deeqaan ciidamada AMISOM diyaarado dagaal oo ka qeybqaata howlgallada ay kula dagaallamayaan Xarakada Al-shabaab.

Qaraar kasoo baxay Midowga Afrika ayaa Labada dal looga dalbaday in diyaaradahaan ay u keenaan AMISOM inta ay ka meel marinayaan golaha ammaanka ee Qaramada Midoobay Sagaal Helicopter iyo Seddax Diyaaradaha Miigga loo yaqaan oo la siin doono AMISOM.

“Waxaa u gudi doono diyaaradaha ay bixiyaan Labadaan dal waxaa dib usiin doono Qaramada Midoobay qeybteeda Saadka ee u qaabilsan howlgalka Midowga Afrika ee Soomaaliya” ayaa lagu yiri qaraarka Midowga Afrika.

Diyaaradahan ayaa waxay ciidamada ka taageeri doonaan dagaallada ka dhanka ah Al-shabaab.

Arrintan ayaa waxay kusoo beegmaysaa xilli dowladda Uganda ay ku weysay Laba diyaarad oo ay ugu deeqday AMISOM sanadkii 2012-ka, kadib markii ay ku burbureen dalka Kenya xilli ay kusoo wajahnaayeen Soomaaliya.

18-kii bishaan ayaa ciidamada Kenya waxay sheegeen in duqeyn diyaaradeed ay ku dileen madaxii sirdoonka ee Xarakada Al-shabaab inkastoo Al-shabaab ay taasi beeniyeen.

Goobjoog News