Faah Faahin:- Madaafiic La’isku Weydaarsaday Deegaanka Leego Ee Sh/hoose

Published March 30, 2016

Akhris 1 daqiiqo ah

Wararka ka imaanaya deegaanka Leego ee gobolka Shabellaha Hoose ayaa waxay sheegayaan in halkaasi xalay ay madaafiic ku weerareen Xarakada Al-shabaab, iyadoo sidoo kale ciidanka AMISOM ay tuureen madaafiic kale oo jawaab u muuqday.

Guddoomiyaha deegaankaasi Abukar Isaaq oo la hadlay Goobjoog News ayaa sheegay in Hobiyeyaal dhowr ah ay Al-shabaab kusoo tuureen degmadaasi balse aanu jirin khasaare ka dhashay madaafiicda lasoo tuuray.

Guddomiyaha ayaa dhinaca kale hoosta ka xarriiqay in markii hoobiyeyaashan ay soo dhaceen ay ciidanka AMISOM ee Leego iyaguna jawaab ka bixiyeen, lamana oga jawaabtaasi khasaaraha ay geysatay.

“Nimankii Al-shabaab ahaa ayaa hobiiyeyaal kusoo tuuray Leego, iyagana waa loo jawaabay, ma jirto wax khasaare ah oo ay madaafiicdoodu geysteen, xaaladda saakana waa mid deggan” ayuu yiri Guddoomiye Abukar.

Xarakada Al-shabaab weli kama aanay hadal madaafiicdaan ay ku garaaceen deegaanka Leego iyo ulajeedka bartilmaameedkooda.

Goobjoog News

Faah Faahin:- Madaafiic La’isku Weydaarsaday Deegaanka Leego Ee Sh/hoose

Ka hel Goobjoog wixii cusub.

From the comments