Waxgarad Baaq u Diray Galmudug Iyo Ahlu-sunna

Qaar ka mid ah waxgaradka Soomaaliyeed ee ku sugan magaalada Gaalkacyo ee gobolka Mudug ayaa baaq nabadeed u diray maamulka Galmudug iyo sidoo kale Ahlu-sunna Waljameeca oo maalmahan dambe lasoo sheegayey in xiisad ay ka dhaxeyso.

Nabadoon C/raxmaan Ibraahim Kheyre oo ka mid ah waxgaradkan ayaa sheegay in hadda aysan habooneen in shacabka loo horseedo dagaal iyo dhibaato cusub.

Waxa uu sheegay in cid walbo oo dagaal billowda loo baahan yahay inay ogaato in maalin un lagala xisaabtami doono.

“Ninkii maanta dagaal billaaba ama ku baaqa cidda ay doonto ha ahaatee waa qof aan joogin dalka waxa uu soo maray, maanta waa maalintii nabadda, dagaal looma baahna, Ahlu-sunna iyo Galmudug waxaan leeyahay isku imaada oo wada hadla” ayuu yiri nabadoonka.

Waxaa jiray maalmihii dambe warar sheegayey in deegaanno ka mid ah gobolka Galgaduud ay ka jirto xiisad u dhaxeysa Galmudug iyo Ahlu-sunna Waljameeca.

Goobjoog News