Ciidamada Dowladda Oo Dib Ula Wareegay Degmada Tiyeeglow, Bakool

Wararka naga soo gaaraya gobolka Bakool ayaa waxay sheegayaan in ciidamada dowladda Federaalka Soomaaliya oo garabsanaya kuwa Koonfur Galbeed ay dib ula wareegeen degmada Tiyeeglow ee gobolka Bakool, halkaasi oo ku dhowaad 20 cisho ay haysteen Xarakada Al-shabaab.

Dagaal kooban oo ka dhacay degmadaasi ayaa la sheegay in ciidamada Al-shabaab ay ku faarujiyeen degmadaasi, gelinkii dambe ee shalay.

Lama soo sheegin wax khasaare ah oo dagaalkaasi ka dhashay, iyadoo saakay xaaladdu tahay mid deggan.

Ciidamada dowadda Federaalka ayaa la sheegayaa in hadda howlgallo ay ka wadaan degmada Tiyeeglow, iyaga oo baadigoobaya rag ka tirsan Al-shabaab.

Saraakiisha hoggaamineysa ciidankan oo aynu xiriir la sameynay waxay sheegeen in saacadaha soo aadan ay ka warbixin doonaan howlgalladan.

Al-shabaab ayaa degmada Tiyeeglow ee gobolka Bakool la wareegey kadib markii ciidamada Itoobiya ay degmadaasi faarujiyeen.

Warkaan wixii kusoo kordha kala soco wararkeena kale

Goobjoog News