Puntland Oo Xukuntay Dad Lala Xiriirinayo Daacish
Maxkamada Darajada 1aad ee Ciidamada iyo danbiyada culus ee Puntland ayaa xukuno dil iyo xabsi daa’in iskugu jira ku xukuntay 5 qof oo maxkamadu ay sheegtay inay heshay inay ka tirsan yihiin kooxda la magacbaxday Daacishta muumin ee ku sugan Puntland.
Gudddoomiyaha Maxkamadan xukunka samaysay Col Cabdifitaax Xaaji Aadan ayaa sheegay in Eedeysanayaasha qaarkood ay qirteen inay kamid yihiin ururka Daacish halka qeybtoodna ay baaris ka dib uu ku cadaaday dambigu .
Dhagasigan dacwada oo ka dhacday xabsiga dhexe ee magaalada Bosaaso ayaa guddoomiyaha maxakamada darajada koobaad ee ciidamada Puntland waxa uu ku dhawaaqay in dil lagu xukumay Cabdulaahi Maxamed Aadan oo 23 jir ahi kuna dhashay degmada Baydhabo kaasi oo tobobar ka soo qaatay shanlanbood islam karnaa ka soo dagaalamay.
Sidoo kale waxa dhagaysiga dacwada ka dib dil lagu xukumay Axmed Aadan Cabdulaahi oo 26 jir ah kaasi oo la sheegay inuu ka mid yahay tobobarayaasha Al-shabaab iyo daacish.
Maxkamada ciidamada qalabka sida ee Puntland waxay iyagana xabsi-daa’in ku xukuntay labo ka mid eedaysanayaashii maxkamada la horkeenay oo kala ahaa Saalax Xuseen Ibraahim oo 26 jir, kuna dashay gobolka Baay iyo Cabdifitaax Jamaal Cabdi oo 19 jir ah, kuna dhashay degmada Afgooye.
Col-. Cabdifataax Xaaji Aadan ayaa sheegay in 20 sanno oo xariga ah lagu xukumay Cabdikariim Siciid Cabdi oo ah 28 jir oo hore loogu qabtay isaga oo sita lix bistooladood oo uu sheegay in aanu garayanin cid u soo dhiibtay halka bistooladihiina ay maxakamadu u xukuntay dawladda Puntland , waxayna maxakamadu xorriyadiisa u soo celisay Cabdirisaaq Xayir Dacar oo ka mid ahaa maxaabiista hore u eedaysnaa kaasi oo uu guddoomiyuhu sheegay in dambigii loo haystay oo ahaa rasaas lagu qabtay uu eediisa iska leexiyey ka dib markii uu fududeeyey in la helo nin kale oo u soo dhiibay.
Qareenka u doodayay eedaysanayaasha xukunka lagu riday, Maxamuud Cawed Cumar ayaa sheegay inuusan ku qanacsanayn xukunka dilka iyo xabsi daa’inka lagu riday , islamarkaana uu rafcaan uu ka qaatay
Gees kale, maxkamadu waxay amar ku bixisay in Farxaan cabdullaahi Faarax oo da’diisu ka yar tahay 15 sanno lgu wareejiyo Wasaaradda Cadaaladda Puntland si loo dhaqanceliyo.
Puntland iyo ciidamo la sheegay inay taabacsan yihiin ururka Daacisha ayaa bishii tobnad ee sannadkan ay weeraro ku dhex mareen ciidamada Puntland iyada oo kooxdan daacishta Soomaaliya aymar la wareegeen deegaanka Qandala ee gobolka Bari.
Goobjoog News