Carwada Buugaagta Kismaayo Oo Laga Daah-furay Magaalada Xeebta Ah

In ka badan kun(1000) buug ayaa maanta lagu soo bandhigay carwada buugaagta ah ee Kismaayo taas oo magaalada xeebta ah ka socon doona muddo labo maalin ah.

Furitaan-ka Bookfair-ka waxaa ka soo qeybgalay madaxweyne ku-xigeenka Jubbaland, wasiirada waxbarashada iyo haweenka iyo sidoo kale duqa magaalada Kismaayo.

Carwada Buugaagta Kismaayo waxaa soo qaban-qaabiyay Scan Som, Naadiga akhriska iyo qoraalka Kismaayo iyo Wasaaradda waxbarashada.

Qaban-qaabiyeyaasha carwadan oo la hadlay Goobjoog News ayaa sheegay in ujeedada laga lahaa ay tahay sidii loo uuq-geyn lahaa nabadda ka jirta Kismaayo, sidii loo dhiirigelin lahaa akhris-ka iyo qoraalka iyo sidoo kale sidii qurbo-joogta loo tusi lahaa maalgeshiga ka jira magaalada Kismaayo.

Qoraayaasha goobta buugaag ku soo bandhigay, kana hadli doona waxaa ka mid ah: Maxamed Sheikh Xasan , Dr. Maxamud Dirie, Ashkar Nuur, Zaki Rabiic, Maxamed Cabdiqadir Dauud iyo rag kale.

Madaxweynaha Soomaaliya Maxamed Cabdulahi Farmaajo waxaa uu bartiisa Twetter-ka ku bogaadiyay carwada buugaagta ee Kismaayo isagoo sheegay in ay qeyb ka tahay soo celinta nabadda.

Goobjoog News