Muxuu ku saabsan yahay Shirka aan caadiga aheyn ee ay yeelanayaan madaxda Bariga Afrika?

Dar es Salaam, Tanzania – Madaxda Bariga Afrika ayaa shir aan caadi ahayn ka yeelanaya xaaladda ka taagan bariga Jamhuuriyadda Dimuqraadiga ah ee Kongo, halkaas oo jabhado hubeysan ay ku fideen, taasoo abuurtay xiisad amni iyo mid bini’aadantinimo.

Shirkan oo ka dhacaya magaalada Dar es Salaam ee dalka Tanzania ayaa waxaa ka qayb-galaya madaxweynayaasha Tanzania, Jamhuuriyadda Dimuqraadiga ah ee Kongo, Rwanda, Koonfur Afrika, Uganda, Soomaaliya, iyo Kenya.

Madaxweynaha Soomaaliya, Xasan Sheekh Maxamuud, ayaa mar kale ku laabanaya Tanzania si uu uga qaybgalo shirka, kaddib markii uu halkaasi ka soo laabtay toddobaadkii hore.

William Ruto,Madaxweynaha Kenya ayaa yirib”Nabadda iyo amniga waa lagama maarmaan si loo horumariyo ganacsiga iyo maalgashiga gobolka. Waxaan si weyn u bogaadinayaa dadaalka hoggaanka Urur Goboleedka Horumarinta Koonfurta Afrika iyo Bulshada Bariga Afrika ee ku aaddan xallinta colaadda Kongo. Dadaal wadajir ah ayaannu ku hubin doonnaa in xasillooni ay ka hana qaaddo qaaraddeenna.”

Shirkan ayaa la filayaa in ay ka soo baxaan go’aamo muhiim ah oo lagu xoojinayo dadaallada lagu xasilinayo Kongo iyo guud ahaan gobolka.