Madaxweynaha SSC-KHAATUMO oo Muqdisho soo gaaray

Hoggaamiyaha Dowlad Goboleedka SSC-Khaatumo, Mudane Cabdiqaadir Axmed Aw-Cali (Firdhiye), ayaa si diirran loogu soo dhaweeyay garoonka diyaaradaha Aadan Cadde ee magaalada Muqdisho.

Soo dhaweynta hoggaamiyaha waxaa ka qeyb galay wasiiro ka tirsan Xukuumadda Federaalka Soomaaliya (XFS), mas’uuliyiin sare oo dowladda ka tirsan, xildhibaanno, iyo qeybaha kala duwan ee bulshada rayidka ah.

Imaanshaha Mudane Firdhiye ee Muqdisho ayaa salka ku haya ka qeybgalka Shirka Golaha Wadatashiga Qaranka oo lagu wado inuu ka dhaco xarunta Villa Soomaaliya 5-ta bishan May.

Shirkan muhiimka ah waxaa casuumaddiisa bixiyay Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, waxaana la filayaa in laga wada hadlo arrimo qaran oo ay ka mid yihiin dib-u-heshiisiinta, dowlad-dhiska, iyo arrimaha doorashooyinka.

Mas’uuliyiinta soo dhaweysay Hoggaamiye Firdhiye ayaa muujiyay sida ay muhiim u tahay ka qeybgalka SSC-Khaatumo ee madasha Wadatashiga Qaranka, taasoo lagu doonayo in lagu xoojiyo wadajirka ummadda Soomaaliyeed iyo xaqiijinta matalaadda gobollada dalka oo dhan.