Khasaare ka dhashay dabaq kusoo dumay Muqdisho

Muqdisho – Waxaa goordhoweyd la xaqiijiyay in uu soo dumay dabaq 9 biyaano ah oo ku yaalla agagaarka Biyamaalooy ee magaalada Muqdisho.

Dhacdadan ayaa argagax iyo murugo ku reebtay dadka deegaanka, iyadoo ay jiraan dhaawacyo badan iyo khasaare nafeed.

Ilaa iyo hadda, wararka hordhaca ah waxay sheegayaan in in ka badan 10 qofood ay dhaawacmeen, kuwaas oo intooda badan lafaha ka jabay, halka hal qof oo dhimasho ah si rasmi ah loo xaqiijiyay.

Dadka dhaawacmay ayaa loo kala qaaday dhowr isbitaal oo ku yaalla gudaha Muqdisho si loogu sameeyo daryeel caafimaad oo degdeg ah.

Ilaa hadda lama oga sababta rasmiga ah ee keentay dumista dhismahan, balse waxaa la filayaa in baaritaan rasmi ah laga bilaabo si loo ogaado khaladaadka farsamo ee sababay musiibadan.

Wixii warar ah ee ku soo kordha warkan, kala soco wararkeena xiga.