Garsoore Cabdulqawi Yuusuf oo Iska Casilay Maxkamadda Caddaaladda Caalamiga ah

Published June 11, 2025

Akhris 2 daqiiqo ah

Garsooraha caanka ah ee Soomaaliyeed, Cabdulqawi Axmed Yuusuf, ayaa si rasmi ah uga iscasilay xilkii uu ka hayay Maxkamadda Caddaaladda Caalamiga ah (ICJ), sida lagu sheegay war kasoo baxay maanta oo ay maxkamaddu si rasmi ah ugu dhawaaqday.

Warbixinta ayaa tilmaamtay in Garsooraha uu xoghayaha guud ee Qaramada Midoobay ku wargeliyay iscasilaaddiisa, taas oo dhaqan geli doonta 30ka Sebteembar 2025.

Cabdulqawi Yuusuf ayaa xubin ka ahaa ICJ tan iyo 6-dii Febraayo 2009, isagoo mudadaas intii ay socotay sidoo kale u adeegay Madaxweyne Ku-xigeenka Maxkamadda (2015–2018) iyo Madaxweynaheeda (2018–2021) — taasoo ka dhigaysa mid ka mid ah shaqsiyaadka ugu miisaanka culus ee abid kasoo jeeda Qaaradda Afrika kana soo shaqeeyay maxkamadda ugu sarreysa ee caalamka.

Qaramada Midoobay ayaa la filayaa in ay qaban doonto doorasho lagu buuxinayo booska bannaan, si loo dhamaystiro muddada xilka ee hartay kadib bixitaanka Garsoore Cabdulqawi.

Is-casilaadda Garsooraha ayaa timid iyadoo aysan jirin wax war rasmi ah oo uu isagu ka bixiyay sababta go’aankiisa, balse dad badan ayaa u arka mid calaamad u ah xilli cusub oo isbeddel ah oo ka bilowda garsoorka caalamiga ah.

Cabdulqawi Yuusuf ayaa si weyn loogu xasuustaa kaalintii uu ku lahaa difaaca danaha Soomaaliya gaar ahaan arrimaha xuduudaha badda ee ICJ laga horgeeyay, isaga oo door muuqda ku lahaa garsoor caalami ah oo caddaalad u horseeday dalka Soomaaliya.

Garsoore Cabdulqawi Yuusuf oo Iska Casilay Maxkamadda Caddaaladda Caalamiga ah

Ka hel Goobjoog wixii cusub.

From the comments