Gogoshii uu ku baaqay madaxweyne Xasan Sheekh Maxamuud in ay maanta dhacdo oo baaqatay

Gogoshii wadatashiga siyaasadeed ee uu Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, qorsheeyay in maanta ay ka dhacdo magaalada Muqdisho, ayaa baaqatay.

Gogoshan oo hore loogu shaaciyay in ay tahay madal furan oo ay ka qeybgalaan dhammaan daneeyeyaasha siyaasadda, gaar ahaah mucaaradka iyo ururada ugu waaweyn dalka, ayaa u muuqata mid aan qabsoomin sababo aan weli si rasmi ah loo shaacin.

Baaqashada madashan ayaa kusoo beegmaysa iyadoo ay taagan tahay xiisad siyaasadeed oo la xiriirta hanaanka doorashooyinka iyo isfaham la’aanta u dhaxaysa Villa Soomaaliya iyo qaar ka mid ah ururada siyaasadeed ee dalka.

Madaxweynaha ayaa horay u sheegay in gogoshani tahay mid lagu doonayo is-afgarad iyo wadar-ogol siyaasadeed si loo sii wado geedi-socodka dimoqraadiyeynta, hase yeeshee, baaqashada maanta ayaa laga yaabaa in ay dib u dhacyo ku keento rajadii laga qabay xal u helidda khilaafaadka jira.

Warar hoose ayaa tilmaamaya in qaar ka mid ah Siyaasiyiinta Mucaaradka iyo maamulada Puntland iyo Jubbaland ay diideen ka qaybgalka, iyagoo ku doodaya in aan la helin damaanad buuxda oo ku saabsan madaxbannaanida iyo ujeedka dhabta ah ee gogosha.

Villa Soomaaliya wali kama aysan hadlin sababta rasmiga ah ee keentay baaqashada madashan.