Madasha Mucaaradka Samata-bixinta oo isku raacay in ay la kulmaan Madaxweyne Xasan Sheekh.

Madasha Samata-bixinta Mucaaradka ay habeenkii xalay kulan ku yeeshay hoyga Madaxweynihii hore Shariif Sheekh Axmed. Kulankan oo lagu tilmaami karo mid muhiim ah, ayaa lagu sheegay inay isku raaceen inay la kulmaan Madaxweyne Xasan Sheekh, iyadoo dalabka kulankaas uu ka yimid Villa Somalia.

Waxaa xusid mudan in Ra’iisul Wasaarihii hore Cumar Cabdirashiid Cali Sharma’arke, oo kamid ah hormuudka Madasha, la filayo inuu maanta soo galo magaalada Muqdisho isagoo ka imaanaya Nairobi.

Xubnaha Madasha ayaa dib ugu soo laabtay caasimadda kadib safarro ay ugu maqnaayeen gudashada waajibaadka Xajka iyo fasaxa Ciidda, taasoo muujinaysa in hadda xoogga la saarayo arrimaha gudaha iyo xalinta kala aragti duwanaanta siyaasadeed ee u dhaxaysa mucaaradka iyo dowladda.

Shir uu horay ugu baaqay Madaxwayne Xasan Shiikh inay kasoo qayb galaan dhamaan xunaha Mucaraadka iyo Dowladda Goboleedyadda ayay ka baaqdeen xubnaha Mucaaradka ee ku midaysan Madasha Samata-bixinta iyo Maamul Goboleedyada Jubaland iyo Puntland oo khilaaf xoogan uu kala dhexeeyo Dowladda Federaalka.

Khilaafkan Siyaasadeed ayaa salka ku haya dhamaystirka Dastuurka iyo hanaanka Doorashooyinka.

Su’aasha ay shacabka Soomaaliyeed isweydiinayaan ayaa ah: kulankan ma noqon doonaa mid horseeda dib u heshiisiin dhab ah, mise waa uun tallaabo siyaasadeed oo kumeelgaar ah?