Mareykanka oo Weerar Ku Qaaday Saddex Xarumo Nukliyeer ah oo Iran Ku Taalla

Mareykanka ayaa si rasmi ah u xaqiijiyay in uu qaaday weerar cirka ah oo culus oo lagu bartilmaameedsaday saddex xarumood oo muhiim ah oo ku yaalla dalka Iran, kuwaas oo kala ah: Fordow, Natanz, iyo Isfahan.

Weerarka oo dhacay xalay saqdii dhexe ayaa si gaar ah diiradda u saaray xarunta Fordow oo ah mid ka mid ah goobaha ugu adag ee lagu kaydiyo barnaamijka nukliyeerka Iran.

Madaxweynaha Mareykanka Donald J. Trump, ayaa sheegay in weerarka uu ahaa “mid guul weyn ah,” isla markaana uu Mareykanku si buuxda u burburiyay qalabkii halista lahaa ee ku jiray goobahaas.

Wuxuu sidoo kale sheegay in dhammaan diyaaradaha dagaalka ee weerarka qaaday ay si nabad ah dib ugu soo laabteen saldhigyadii ay ka duuleen.

Dhanka Iran, Afhayeen u hadlay wasaaradda difaaca ayaa sheegay in “waxyeello fudud oo xadidan” ay gaartay xarumaha, balse lagu guuleystay in shaqaalaha laga saaro goor hore, islamarkaana aysan jirin wax wasakhow ah oo nukliyeer ah oo dhacay. Dowladda Iran ayaa cambaareysay weerarka, iyadoo ku tilmaantay xadgudub cad oo ka dhan ah sharciga caalamiga ah.