Dowladda Federaalka Soomaaliya oo qaaday Xayiraadihii dhanka Duulimaadyada ee saarnaa Jubbaland

Dowladda Federaalka Soomaaliya ayaa si rasmi ah u qaaday xanibaaddii saarneyd duulimaadyada tooska ah ee u dhaxeeyay magaalooyinka Kismaayo iyo Nairobi, iyo sidoo kale Kismaayo iyo Dhoobleey.

Go’aankan ayaa maanta dhaqangalay Sida ay xaqiijiyeen masuuliyiinka tirsan Jubbaland.

Xayiraadda oo saarnayd muddo, ayaa sababtay in dadku ay mari waayaan safarro muhiim ah oo ay la xiriirto caafimaad, ganacsi iyo isdhexgal bulsho, taas oo si weyn u saameysay dhaqaalaha iyo xiriirka qoysas badan.

Ganacsatada iyo shacabka deegaanka ayaa si weyn u soo dhaweeyay arrintan, iyagoo ku tilmaamay guul weyn oo la gaaray, una baahan in la joogteeyo duulimaadyada si aanay mar kale u kala go’in.

Duulimaadyada ayaa ka dhashay khilaafkii u dhaxeeyay maamulka Jubbaland iyo Dowladda Soomaaliya ee ka dhashay arrimaha la xariira doorashooyinka.