Wafdi ka socda Dowladda Federaalka ee Soomaaliya oo gaaray Laascaanood

Wasiirka Wasaaradda Arrimaha Gudaha, Federaalka iyo Dib-u-heshiisiinta Xukuumadda Federaalka Soomaaliya, Xildhibaan Cali Yuusuf Cali-Xoosh, ayaa maanta kulan muhiim ah kula yeeshay magaalada Laascaanood Hoggaamiyaha Maamulka SSC-Khaatumo, Mudane Cabdulqaadir Axmed Aw Cali Firdhiye.

Kulankan oo ay goob-joog ka ahaayeen mas’uuliyiin kale oo ka tirsan Dowladda Federaalka Soomaaliya, ayaa diiradda lagu saaray dhameystirka hanaanka maamul-dhismeedka rasmiga ah ee SSC-Khaatumo, iyadoo ay socdaan dadaallo lagu xoojinayo xiriirka ka dhexeeya maamulka deegaanka iyo dowladda dhexe.

Wasiir Cali-Xoosh ayaa sheegay in socdaalkiisa Laascaanood uu yahay mid dowladda Federaalka uga gol leedahay in si rasmi ah loo dhameystiro dhismaha maamulka SSC-Khaatumo si uu uga mid noqdo hanaanka Federaalka dalka, loogana gudbo caqabadaha siyaasadeed, amni iyo bulsho ee ka jira gobolka.

Dhankiisa, Hoggaamiye Firdhiye ayaa si diirran u soo dhaweeyay wafdiga Dowladda Federaalka, isaga oo muujiyay diyaar garowga maamulka SSC-Khaatumo ee ku aaddan dhameystirka maamulka iyo ka qeybgalka wada-hadallada qaran ee mustaqbalka Soomaaliya.

Kulankan ayaa qeyb ka ah dadaallada dib-u-heshiisiinta, dowlad-dhisidda iyo adkeynta midnimada ummadda Soomaaliyeed.

Wasiir Cali-Xoosh ayaa sidoo kale la filayaa inuu kulamo la yeesho qeybaha bulshada magaalada Laascaanood, si loo dhegeysto aragtidooda ku aaddan mustaqbalka maamulka iyo doorkooda siyaasadeed.