Wafdi ka socda Dowladda Soomaaliya oo gaaray Baydhabo

Published July 21, 2025

Akhris 2 daqiiqo ah

Baydhabo, Soomaaliya – Wasiirka Amniga Gudaha ee Dowladda Koonfur Galbeed, Mudane Xasan Cabduqaadir Maxamed, ayaa maanta si rasmi ah ugu soo dhoweeyay magaalada Baydhabo wafdi heer sare ah oo uu hoggaaminayay Wasiirka Amniga ee Xukuumadda Federaalka Soomaaliya, Mudane Cabdullaahi Sheekh Ismaaciil (Fartaag).

Soo dhaweynta ayaa ka dhacday garoonka diyaaradaha ee magaalada Baydhabo, iyadoo ay goob joog ka ahaayeen saraakiisha hay’adaha amniga, maamulka degmada Baydhabo, iyo masuuliyiin kale oo ka tirsan dowlad-goboleedka Koonfur Galbeed.

Wafdiga Wasiirka Amniga ayaa waxaa qeyb ka ahaa Wasiir ku xigeenka Arrimaha Dibadda XFS, Mudane Isack Maxamuud Mursal, iyo Wasiir ku xigeenka Wasaaradda Qorsheynta XFS, Mudane Maxamed Aadan Maxamed.

Socdaalka wafdigan ayaa salka ku haya ka qeybgalka munaasabadda xarig-jarka xarunta cusub ee Wasaaradda Amniga ee Dowlad-goboleedka Koonfur Galbeed, taasoo laga hirgeliyay magaalada Baydhabo. Xaruntan cusub ayaa lagu wadaa in ay xoojiso howlaha maamulka amniga iyo kordhinta adeegyada la xiriira sugidda nabadgelyada.

Mas’uuliyiinta labada dhinac ayaa sidoo kale kulamo gaar ah ka yeeshay xoojinta wada shaqeynta hay’adaha amniga ee heer federaal iyo heer dowlad-goboleed, iyadoo la isla gartay in la dardar geliyo qorshayaasha la xiriira amniga gobolka.

Wafdi ka socda Dowladda Soomaaliya oo gaaray Baydhabo

Ka hel Goobjoog wixii cusub.

From the comments