Shirka ka socda Laascaanood ee dhismaha maamulka Sool iyo Sanaag oo wajahaya caqabado waa weyn

Shirkii siyaasadeed ee ka socday magaalada Laascaanood, kaas oo muddooyinkii u dambeeyay ay indhaha bulshada Soomaaliyeed iyo beesha caalamkaba ku sii jeedeen, ayaa si rasmi ah u baaqday maanta, kaddib markii uu fashilmay qorshihii lagu waday in lagu soo xiro.

Wararka laga helayo ilo muhiim ah oo ku sugan gudaha hoolka shirka ayaa xaqiijinaya in sababta ugu weyn ee keentay baaqashada shirka ay tahay khilaaf baahsan oo ka dhex aloosan ergada ka qeyb galeysa, gaar ahaan ku saabsan habka loo qeybinayo 79 xildhibaan ee la doonayay in lagu dhiso maamul cusub.

Khilaafkan ayaa salka ku haya saami qeybsiga beelaha iyo habka ay xubnaha u kala helayaan kuraasta, taasoo ah arrin miisaan weyn ku leh wada-hadallada iyo heshiisyada siyaasadeed ee gobolka.

Qaar ka mid ah ergada ayaa si cad u sheegay in aysan suurta gal ahayn in la gaaro heshiis, haddii aan si dhab ah loo xallin tabashooyinka iyo walaacyada ay qabaan beelaha qaar.

Dowladda Federaalka Soomaaliya oo gacan ka geysaneysay gardaadinta shirka, ayaa dadaal badan gelisay sidii uu shirku guul ku dhammaan lahaa, waxaana wakiillo sare ka tirsan dowladda ay maalmihii la soo dhaafay kulamo gaar gaar ah la lahaayeen hoggaanada dhaqanka iyo siyaasiyiinta deegaanka.

Si kastaba ha ahaatee, dadaalladaas wali midho ma dhalin, waxaana muuqata in qodobada la isku haysto ay yihiin kuwo adag oo u baahan wakhti dheeri ah iyo tanaasul dhab ah.

Xubno ka mid ah ergada ayaa sheegay in rajadu aysan gebi ahaanba dhiman, balse loo baahan yahay dib u eegis qoto dheer oo lagu sameeyo hab-raaca shirka iyo qaabka loo wajahayo arrimaha taagan.